નવી દિલ્હી : પશ્ચિમ એશિયામાં ઇરાન પર અમેરિકા અને ઇઝરાયેલના યુદ્ધની ભયાનક અસરો હવે એશિયાના દેશોમાં દેખાવા લાગી છે. ઇંધણની તીવ્ર અછતને કારણે એશિયાના અનેક ભાગોમાં અરાજકતા અને હિંસા ફાટી નીકળી છે. ખાસ કરીને ભારત, પાકિસ્તાન અને બાંગ્લાદેશમાં ગેસ સ્ટેશનો પર ઇંધણ માટે પડાપડી થઈ રહી છે, જે હવે જીવલેણ લડાઈમાં ફેરવાઈ રહી છે. મોંઘા તેલ અને ખાલી થતા પંપોએ સામાન્ય જનતામાં ગભરાટ ફેલાવ્યો છે.
બાંગ્લાદેશમાં અડધી રાત્રે લૂંટફાટ
બાંગ્લાદેશમાં સ્થિતિ અત્યંત ગંભીર બની છે. ત્યાંના ગેસ સ્ટેશન માલિકોના સંગઠન અનુસાર, મધ્યરાત્રિએ ગેરકાયદેસર સિન્ડિકેટ સક્રિય થઈ રહ્યા છે જે ઇંધણની ચોરી કરી રહ્યા છે. આટલું જ નહીં, રસ્તા પર જતા ઇંધણના ટેન્કરો અને પરિવહન વાહનો પર હિંસક દરોડા પાડીને સ્ટોક લૂંટી લેવામાં આવી રહ્યો છે. પુરવઠો સંગ્રહ કરવા માટે ચાલી રહેલી આ ખેંચતાણમાં કાયદો અને વ્યવસ્થાના લીરેલીરા ઉડી રહ્યા છે.
કામદારો પર જીવલેણ હુમલા
ઇંધણના અભાવે ફેલાયેલા આક્રોશનો ભોગ નિર્દોષ કામદારો બની રહ્યા છે. ભારત, પાકિસ્તાન અને બાંગ્લાદેશના અધિકારીઓએ અહેવાલ આપ્યો છે કે અનેક ગેસ પંપ કામદારોની હત્યા કરવામાં આવી છે. કેટલાક કિસ્સાઓમાં ઇંધણ ચોરી કરવાના ઇરાદે હુમલા થયા છે, તો ક્યાંક કલાકો સુધી લાઇનમાં ઉભા રહ્યા બાદ તેલ ન મળતા ગુસ્સે ભરાયેલા ટોળાએ કામદારો પર હુમલો કરી દીધો છે. આ હિંસાએ આખા એશિયામાં અસ્થિરતાનું વાતાવરણ ઉભું કર્યું છે.
ફિલિપાઇન્સમાં હડતાળ અને વિરોધ
ઇંધણના ભાવમાં થયેલા અસહ્ય વધારાની અસર પૂર્વ એશિયા સુધી પહોંચી છે. ફિલિપાઇન્સમાં ગયા અઠવાડિયે હજારો પરિવહન કામદારોએ રસ્તા પર ઉતરીને વિરોધ પ્રદર્શન કર્યું હતું. ડીઝલના વધતા ભાવો સામે નારાજગી વ્યક્ત કરવા માટે ટ્રાન્સપોર્ટ યુનિયનોએ હડતાળ પાડી હતી, જેના કારણે જનજીવન ખોરવાઈ ગયું હતું. યુદ્ધની આ આગ માત્ર સરહદો પૂરતી મર્યાદિત ન રહેતા હવે સામાન્ય નાગરિકના રસોડા અને વાહન સુધી પહોંચી ગઈ છે.
વૈશ્વિક સ્તરે ઇંધણની સપ્લાય ચેઇન ખોરવાતા એશિયાઈ દેશો અત્યારે એક અઘોષિત કટોકટીનો સામનો કરી રહ્યા છે, જ્યાં તેલના એક-એક ટીપા માટે લોહી વહી રહ્યું છે.