રાજકોટ: તા.૩ મધ્ય પૂર્વમાં ચાલી રહેલા ભીષણ સંઘર્ષ વચ્ચે અમેરિકી લશ્કર એટલે કે પેન્ટાગોન પર ગંભીર આરોપો લાગ્યા છે. એક ચોંકાવનારા રિપોર્ટમાં દાવો કરવામાં આવ્યો છે કે અમેરિકા પોતાના સૈનિકોના મોત અને ઈજાના સાચા આંકડા દુનિયાથી છુપાવી રહ્યું છે. મીડિયા આઉટલેટ 'ઇન્ટરસેપ્ટ' ના અહેવાલ મુજબ, ઈરાન વિરુદ્ધના આ યુદ્ધમાં અત્યાર સુધીમાં અંદાજે ૭૫૦ અમેરિકી સૈનિકો ઘાયલ થયા છે, પરંતુ સેન્ટ્રલ કમાન્ડ (CENTCOM) હજુ પણ જૂના અને અત્યંત ઓછા આંકડાઓ રજૂ કરી રહી છે.
આંકડાઓની માયાજાળ અને 'હતાહત' છુપાવવાની રમત
રિપોર્ટમાં જણાવ્યા અનુસાર, એક રક્ષા અધિકારીએ નામ ન આપવાની શરતે કબૂલ્યું છે કે અમેરિકી સેના વાસ્તવિક નુકસાન છુપાવવા માટે રમત રમી રહી છે. CENTCOM ના પ્રવક્તા કેપ્ટન ટિમ હોકિન્સે સોમવારે માત્ર ૩૦૩ સૈનિકો ઘાયલ હોવાનું જણાવ્યું હતું, પરંતુ આ આંકડામાં તાજેતરમાં સાઉદી અરેબિયાના પ્રિન્સ સુલતાન એરબેઝ પર થયેલા હુમલાનો સમાવેશ કરવામાં આવ્યો નથી, જેમાં ઓછામાં ઓછા ૧૫ સૈનિકો ઘવાયા હતા.
અમેરિકી લશ્કરી બેઝ બન્યા નિશાન
ઈરાનના હુમલાઓને કારણે બહેરીન, ઈરાક, જોર્ડન, કુવૈત, કતર, સાઉદી અરેબિયા અને સીરિયામાં આવેલા અમેરિકી લશ્કરી મથકોને ભારે નુકસાન પહોંચ્યું છે. ઈરાનના વિદેશ મંત્રી સૈયદ અબ્બાસ અરાઘચીએ સોશિયલ મીડિયા પ્લેટફોર્મ 'X' પર કટાક્ષ કરતા લખ્યું છે કે, "અમેરિકી સૈનિકો હવે તેમના મથકો છોડીને ઓફિસોમાં ભરાઈ ગયા છે." CENTCOM અત્યારે એ પણ જણાવવાનો ઇનકાર કરી રહ્યું છે કે તેમના કેટલા બેઝ પર હુમલા થયા છે.
માનવ ઢાલનો વિવાદ
યુદ્ધના મેદાનમાં હવે આરોપ-પ્રત્યારોપની રાજનીતિ પણ તેજ થઈ છે. અમેરિકા અને ઈઝરાયેલનો આરોપ છે કે ઈરાન સમર્થિત જૂથો નાગરિકોનો 'માનવ ઢાલ' તરીકે ઉપયોગ કરી રહ્યા છે, જ્યારે ઈરાને આક્ષેપ કર્યો છે કે અમેરિકી સૈનિકો ડરના માર્યા છુપાઈ રહ્યા છે. સાવજનિક અહેવાલો મુજબ અત્યાર સુધીમાં ઓછામાં ઓછા ૧૫ અમેરિકી સૈનિકોના મોતની પુષ્ટિ થઈ છે, પરંતુ સાચો આંકડો આનાથી ઘણો વધારે હોઈ શકે છે.
વૈશ્વિક સ્તરે વધી રહેલો આ તણાવ હવે માત્ર લશ્કરી જંગ નથી રહ્યો, પણ માહિતી અને આંકડાઓના યુદ્ધમાં પણ ફેરવાઈ ગયો છે. આગામી દિવસોમાં અમેરિકા આ મુદ્દે શું સ્પષ્ટતા કરે છે તેના પર આખી દુનિયાની નજર છે.