વિશાખાપટ્ટનમ ખાતે ભારતની દરિયાઈ સુરક્ષા વધુ મજબૂત બનવા તરફ એક મહત્વપૂર્ણ પગલું ભરાયું છે. ભારતીય નૌસેનામાં અત્યાધુનિક યુદ્ધજહાજ INS તારાગિરીને સત્તાવાર રીતે સામેલ કરવામાં આવ્યું છે. સંરક્ષણ પ્રધાન રાજનાથસિંહએ આ યુદ્ધજહાજને ભારતીય નૌસેનાને સોંપ્યું હતું. INS તારાગિરીને ‘ઓલ રાઉન્ડર’ યુદ્ધજહાજ તરીકે ઓળખવામાં આવે છે, જે દુશ્મનોની રડારથી બચી શકે તેવી આધુનિક સ્ટેલ્થ ક્ષમતાઓ ધરાવે છે. આ યુદ્ધજહાજ બ્રહ્મોસ સુપરસોનિક મિસાઈલથી સજ્જ છે અને તેમાં આધુનિક એર ડિફેન્સ સિસ્ટમ પણ સ્થાપિત કરવામાં આવી છે, જે તેને હવાઈ અને સમુદ્રી હુમલાઓ સામે વધુ સક્ષમ બનાવે છે. ખાસ વાત એ છે કે INS તારાગિરી સ્વદેશી ટેક્નોલોજીથી બનાવવામાં આવ્યું છે, જે ‘મેક ઇન ઇન્ડિયા’ અભિયાનને વધુ બળ આપે છે. આ યુદ્ધજહાજના સમાવેશથી ભારતીય નૌસેનાની શક્તિમાં વધારો થશે અને દેશની દરિયાઈ સરહદોની સુરક્ષા વધુ મજબૂત બનશે.