મુંબઈ: ભારતીય સિનેમાની સૌથી લોકપ્રિય સસ્પેન્સ ફ્રેન્ચાઈઝી 'દ્રશ્યમ 3' રિલીઝ થાય તે પહેલા જ એક અસલી ડ્રામામાં ફસાઈ ગઈ છે. મોહનલાલના ચાહકો જ્યારે આ ફિલ્મના ત્રીજા ભાગની આતુરતાથી રાહ જોઈ રહ્યા છે, ત્યારે દિગ્ગજ OTT પ્લેટફોર્મ એમેઝોન પ્રાઈમ વીડિયોએ ફિલ્મના નિર્માતાઓ સામે લાલ આંખ કરી છે. એમેઝોને સત્તાવાર જાહેર નોટિસ જારી કરીને દાવો કર્યો છે કે 'આશીર્વાદ સિનેમા' સાથે થયેલા અગાઉના કરાર મુજબ, 'દ્રશ્યમ 3' ના તમામ ડિજિટલ સ્ટ્રીમિંગ અધિકારો પર માત્ર તેમનો જ એકાધિકાર છે. જો નિર્માતાઓ આ અધિકારો અન્ય કોઈ પ્લેટફોર્મને વેચવાની કોશિશ કરશે, તો તેમને ભારે કાનૂની પરિણામો ભોગવવા પડશે.

આ વિવાદનું મુખ્ય કેન્દ્ર 'ડિજિટલ રાઈટ્સ' છે. એમેઝોનનું કહેવું છે કે કરાર મુજબ હવે આશીર્વાદ સિનેમા કે તેની સાથે સંકળાયેલી કોઈ પણ વ્યક્તિ આ ફિલ્મના ઓનલાઈન ટેલિકાસ્ટના માલિક નથી. ટેકનિકલ ભાષામાં સમજીએ તો, એકવાર જ્યારે નિર્માતા કોઈ પ્લેટફોર્મ સાથે એક્સક્લુઝિવ ડીલ કરી લે છે, ત્યારે તેઓ તે જ પ્રોજેક્ટને ફરીથી ત્રીજા પક્ષને વેચી શકતા નથી. એમેઝોને ચેતવણી આપી છે કે જો તેમની પરવાનગી વિના કોઈ પણ પ્રકારનો વ્યવહાર થશે, તો તેઓ ફિલ્મની રિલીઝ રોકવા અથવા નુકસાનીના વળતર માટે કાનૂની કાર્યવાહી કરવા માટે તૈયાર છે. આ સમાચારથી ફિલ્મ ઈન્ડસ્ટ્રીમાં સોંપો પડી ગયો છે, કારણ કે 'દ્રશ્યમ 3' જેવી મેગા-હિટ ફિલ્મ માટે કરોડો રૂપિયાનો દાવ લાગેલો છે.

ભારતમાં સિનેમેટોગ્રાફ એક્ટ અને કોપીરાઈટ કાયદાઓ અત્યંત કડક છે. જો નિર્માતાઓ કરારનો ભંગ કરે છે, તો તેમને જેલની સજાની સાથે કરોડોનો દંડ પણ થઈ શકે છે. નિષ્ણાતો માને છે કે જો આ મામલો કોર્ટમાં જશે, તો ફિલ્મની શૂટિંગ અથવા રિલીઝમાં મોટો વિલંબ થઈ શકે છે. અત્યારે તો એવું લાગે છે કે વિજય સાલગાંવકર (પાત્ર) ની જેમ જ ફિલ્મના નિર્માતાઓએ પણ આ કાનૂની ગુંચવણમાંથી બહાર આવવા માટે કોઈ 'માસ્ટર પ્લાન' બનાવવો પડશે. શું એમેઝોન પ્રાઈમ આ ફિલ્મને પકડી રાખશે કે પછી નિર્માતાઓ કોઈ વચલો રસ્તો કાઢશે, તે જોવું રસપ્રદ રહેશે.