તિરુવનંતપુરમ : કેરળ વિધાનસભા ચૂંટણીના ગરમાવા વચ્ચે વડાપ્રધાન નરેન્દ્ર મોદીએ એક વિશાળ જનસભાને સંબોધતા કોંગ્રેસ અને ડાબેરી પક્ષો પર આકરા પ્રહારો કર્યા છે. પીએમ મોદીએ ગંભીર આરોપ લગાવ્યો કે પશ્ચિમ એશિયામાં ચાલી રહેલા ભીષણ યુદ્ધ અને અસ્થિરતા વચ્ચે કોંગ્રેસના નેતાઓ બેજવાબદાર નિવેદનો આપી રહ્યા છે, જે ખાડી દેશોમાં વસતા લાખો ભારતીયોની સુરક્ષાને જોખમમાં મૂકી શકે છે. તેમણે સ્પષ્ટ કર્યું કે ભારત સરકારના ગલ્ફ દેશો સાથેના મજબૂત સંબંધોને કારણે જ ત્યાં વસતા ભારતીયો આજે સુરક્ષિત છે, પરંતુ વિપક્ષી નેતાઓ માત્ર વોટ બેંકના રાજકારણ માટે રાષ્ટ્રીય સુરક્ષા સાથે સમાધાન કરી રહ્યા છે.

વડાપ્રધાને કેરળના યુવાનોના સ્થળાંતરના મુદ્દાને રાજ્યનો સૌથી મોટો પડકાર ગણાવ્યો હતો. તેમણે કહ્યું કે રાજ્યમાં ઉદ્યોગો અને સ્ટાર્ટઅપ્સના અભાવે પ્રતિભાશાળી યુવાનોએ બહાર જવું પડે છે, જેના માટે ભ્રષ્ટાચાર અને સાંપ્રદાયિક રાજકારણ જવાબદાર છે. મહિલા સશક્તિકરણ પર ભાર મૂકતા પીએમએ જણાવ્યું કે તેમની સરકારે 'નારી શક્તિ વંદન અધિનિયમ' દ્વારા મહિલાઓને વિધાનસભા અને લોકસભામાં 33 ટકા અનામત આપીને ઈતિહાસ રચ્યો છે. જનધન ખાતા, શૌચાલય અને 'લખપતિ દીદી' જેવી યોજનાઓથી કેરળની દીકરીઓ હવે આત્મનિર્ભર બની રહી છે, જ્યારે વિપક્ષી ગઠબંધન માત્ર ખુરશી બચાવવામાં વ્યસ્ત છે.

રેલીના અંતે પીએમ મોદીએ વિપક્ષી ગઠબંધન પર કટાક્ષ કરતા કહ્યું કે કોંગ્રેસ અને ડાબેરીઓ એકબીજાને ભાજપની 'બી ટીમ' કહીને જનતાને ગેરમાર્ગે દોરે છે, પરંતુ વાસ્તવમાં ભાજપ જ કેરળના વિકાસ માટેની અસલી 'એ ટીમ' છે. ઈરાન અને પશ્ચિમ એશિયામાં ફસાયેલા ગોવા, કેરળ અને તમિલનાડુના માછીમારોને સુરક્ષિત પાછા લાવવાની ખાતરી આપતા તેમણે કહ્યું કે સરકાર માટે લોકોની સુરક્ષા એ સર્વોપરી છે. પીએમની આ મુલાકાતથી કેરળના રાજકારણમાં નવો વળાંક આવવાની શક્યતા છે, કારણ કે તેમણે સીધો જનતાના હિત અને વૈશ્વિક સંબંધોને સ્થાનિક પ્રશ્નો સાથે સાંકળી લીધા છે.