દુબઈ : રેતીના રણમાં દિવસ-રાત પરસેવો પાડીને વતનમાં નાણું મોકલતા લાખો ભારતીયોના હાથ આજે યુદ્ધના ભયથી થથરી રહ્યા છે. અમેરિકા, ઈઝરાયેલ અને ઈરાન વચ્ચે વધી રહેલી આંતરરાષ્ટ્રીય ખેંચતાણ હવે માત્ર સરહદો પૂરતી મર્યાદિત નથી રહી, પરંતુ તેની સીધી અસર ખાડી દેશોમાં વસતા અંદાજે ૯૦ લાખ ભારતીયોના રસોડા સુધી પહોંચી ગઈ છે. સંયુક્ત આરબ અમીરાત (UAE), સાઉદી અરેબિયા અને કતાર જેવા દેશોમાં ચાલી રહેલા અનેક મગજ પ્રોજેક્ટ્સ પર અચાનક બ્રેક લાગી ગઈ છે, જેના કારણે એન્જિનિયરથી લઈને મજૂર સુધીના તમામ વર્ગના લોકોમાં બેરોજગારીનો ભય વ્યાપી ગયો છે.
મધ્ય પૂર્વમાં યુદ્ધની સ્થિતિને કારણે તેલ અને ગેસ ઉદ્યોગ તેમજ બાંધકામ ક્ષેત્ર (Construction Sector) સૌથી વધુ પ્રભાવિત થયા છે. અનેક મલ્ટીનેશનલ કંપનીઓએ ખર્ચમાં કાપ મૂકવાના બહાને મોટાપાયે છટણી (Layoffs) શરૂ કરી દીધી છે. ખાસ કરીને યુપી અને બિહારના શ્રમિકો જેઓ મોટી સંખ્યામાં કન્સ્ટ્રક્શન સાઇટ્સ પર કાર્યરત છે, તેમને પરત મોકલવાની તૈયારીઓ શરૂ થઈ ચૂકી છે. આ સિવાય હોસ્પિટાલિટી અને હેલ્થકેર સેક્ટરમાં પણ નવા પ્રોજેક્ટ્સ અટકી પડ્યા હોવાથી ભારતીય પ્રોફેશનલ્સ માટે હવે ઉજ્જવળ ભવિષ્ય પર પ્રશ્નાર્થ ચિહ્ન મુકાયું છે.
ભારત માટે આ સ્થિતિ આર્થિક દ્રષ્ટિએ પણ ચિંતાજનક છે. કેરળ, તેલંગાણા અને પંજાબ જેવા રાજ્યોના અર્થતંત્રમાં ખાડી દેશોમાંથી આવતા નાણાં (Remittance) નો મોટો હિસ્સો હોય છે. જો આ ૯૦ લાખ ભારતીયોમાંથી મોટો વર્ગ બેરોજગાર થઈને વતન પરત ફરશે, તો ભારત આવતા વિદેશી હૂંડિયામણમાં મોટો ઘટાડો નોંધાઈ શકે છે. અત્યારે તો ખાડી દેશોમાં વસતા ભારતીયો માત્ર એક જ પ્રાર્થના કરી રહ્યા છે કે આ વૈશ્વિક તણાવ જલ્દી શાંત થાય અને તેમના રોજગાર પર આવેલું સંકટ ટળે.
 
આજના અન્ય મહત્વના સમાચાર:
•    ભોપાલ: કાળજું કંપાવતો અકસ્માત, ચાલતી ટ્રેન પકડવા જતાં પ્લેટફોર્મ અને ટ્રેન વચ્ચે યુવક ફસાયો, વીડિયો સોશિયલ મીડિયા પર વાયરલ.
•    તેલંગાણા: રાજ્યમાં ગરમીનો પારો ૪૧ ડિગ્રીને પાર, હૈદરાબાદમાં સૂર્યદેવના આકરા તેવર.
•    નાસિક: ઢોંગી બાબા અશોક ખરાટના પાપના સામ્રાજ્યનો પર્દાફાશ, ૧૦૦થી વધુ મહિલાઓના શોષણના વીડિયો મળ્યા.