ઈસ્લામાબાદ : પશ્ચિમ એશિયામાં અમેરિકા અને ઈરાન વચ્ચે ફાટી નીકળેલા ભીષણ યુદ્ધને શાંત પાડવા માટે પાકિસ્તાન દ્વારા કરવામાં આવી રહેલી મધ્યસ્થીની કોશિશો અત્યારે વિવાદોમાં ઘેરાઈ છે. પાકિસ્તાન સરકાર અને વિદેશ મંત્રાલયે શનિવારે તે મીડિયા અહેવાલોને સદંતર નકારી કાઢ્યા હતા, જેમાં દાવો કરવામાં આવ્યો હતો કે અમેરિકા-ઈરાન વચ્ચે શાંતિ મંત્રણા કરાવવાની પાકિસ્તાનની પહેલ નિષ્ફળ રહી છે. વિદેશ કાર્યાલયના પ્રવક્તા તાહિર અંદ્રાબીએ એક સત્તાવાર નિવેદન જાહેર કરીને આ અહેવાલોને "કલ્પનાની ઉપજ" ગણાવ્યા છે.
આ વિવાદની શરૂઆત ત્યારે થઈ જ્યારે 'ડોન' અખબાર સહિતના મીડિયા માધ્યમોએ અનામી સત્તાવાર સ્ત્રોતોને ટાંકીને જણાવ્યું કે, પાકિસ્તાન અને ચીને ઈરાનને વાટાઘાટોના ટેબલ પર લાવવા ઘણા પ્રયાસો કર્યા, પરંતુ તેહરાન તરફથી કોઈ સકારાત્મક સંકેત મળ્યો નથી. અહેવાલો મુજબ, ઈરાનના સૈન્ય અને નાગરિક માળખાને ભારે નુકસાન થયું હોવા છતાં, તેહરાન અત્યારે કોઈ પણ પ્રકારના સંવાદ માટે તૈયાર નથી. આ અહેવાલોને કારણે આંતરરાષ્ટ્રીય સ્તરે પાકિસ્તાનની રાજદ્વારી પહોંચ પર સવાલો ઉભા થયા હતા, જેના જવાબમાં વિદેશ મંત્રાલયે સ્પષ્ટતા કરવી પડી છે.
ઉલ્લેખનીય છે કે, ૨૮ ફેબ્રુઆરીએ અમેરિકા અને ઈઝરાયલે સંયુક્ત રીતે ઈરાન પર કરેલા હુમલા બાદ સમગ્ર ગલ્ફ ક્ષેત્રમાં યુદ્ધની જ્વાળાઓ ફેલાઈ ગઈ છે. આ હુમલામાં ઈરાનના સુપ્રીમ લીડર આયાતુલ્લાહ અલી ખામેની અને ટોચના કમાન્ડરો માર્યા ગયા હતા, જેનો બદલો લેવા ઈરાને વળતો પ્રહાર કર્યો હતો. પાકિસ્તાન માટે આ સંઘર્ષ વધુ પડકારજનક છે કારણ કે તેણે સાઉદી અરેબિયાના રક્ષણની પણ ખાતરી આપી છે. હાલમાં હોર્મુઝ સ્ટ્રેટમાં ઊર્જા પુરવઠો ખોરવાતા વિશ્વભરમાં આર્થિક સંકટ તોળાઈ રહ્યું છે, ત્યારે પાકિસ્તાન પોતાને આ યુદ્ધથી દૂર રાખીને શાંતિ દૂતની ભૂમિકા ભજવવા મથામણ કરી રહ્યું છે.