કુલ્લુ:હિમાચલ પ્રદેશના કુલ્લુ જિલ્લાના બંજર સબ-ડિવિઝન હેઠળના સોઝા પાસે શનિવારે મોડી રાત્રે એક મોટી દુર્ઘટના સર્જાઈ છે. ઔટ-લુહરી-સૈંજ નેશનલ હાઈવે-૩૦૫ પર પ્રવાસીઓથી ભરેલી એક ટ્રાવેલર બસ અનિયંત્રિત થઈને ઊંડી ખીણમાં પડી જતાં અરેરાટી વ્યાપી ગઈ છે. આ ભયાનક અકસ્માતમાં અત્યાર સુધીમાં ત્રણ પ્રવાસીઓના મોત નિપજ્યા છે, જ્યારે અન્ય મુસાફરો ગંભીર રીતે ઘાયલ થયા હોવાના અહેવાલ મળી રહ્યા છે.

જલોડી જોતથી પરત ફરતી વખતે સર્જાયો અકસ્માત:
મળતી માહિતી મુજબ, ટ્રાવેલર બસમાં અંદાજે ૧૫ જેટલા પ્રવાસીઓ સવાર હતા. આ તમામ પ્રવાસીઓ જલોડી જોત વિસ્તારમાં ફરવા ગયા હતા અને ત્યાંથી પરત ફરી રહ્યા હતા ત્યારે સોઝા નજીક આ અકસ્માત નડ્યો હતો. અચાનક બદલાયેલા હવામાનને કારણે રસ્તા પર લપસણ વધી ગઈ હતી અને રસ્તો પણ અત્યંત ખરાબ હાલતમાં હોવાને કારણે ચાલકે વાહન પરથી કાબૂ ગુમાવી દીધો હતો. વાહન ખીણમાં પડતા જ તેના કુચેકુચા ઉડી ગયા હતા.

તંત્ર દ્વારા યુદ્ધના ધોરણે રાહત અને બચાવ કામગીરી:
અકસ્માતની જાણ થતા જ બંજર પોલીસ, ફાયર બ્રિગેડ અને વહીવટી તંત્રની ટીમો ઘટનાસ્થળે પહોંચી ગઈ હતી. બંજરના એસડીએમ પંકજ શર્માએ ત્રણ લોકોના મોતની પુષ્ટિ કરી છે અને જણાવ્યું છે કે ૧૧ ઘાયલોને સુરક્ષિત રીતે રેસ્ક્યુ કરી લેવામાં આવ્યા છે. તમામ ઇજાગ્રસ્તોને તાત્કાલિક સારવાર માટે બંજર હોસ્પિટલમાં ખસેડવામાં આવ્યા છે, જ્યાં તેમની હાલત મુજબ વધુ સારવાર માટે અન્ય હોસ્પિટલમાં રેફર કરવાની તજવીજ હાથ ધરાઈ છે.

સ્થાનિકો અને ધારાસભ્ય ઘટનાસ્થળે:
અકસ્માત એટલો ગંભીર હતો કે ઘટનાસ્થળે અફરાતફરીનો માહોલ સર્જાયો હતો. સ્થાનિક લોકોએ પણ પોલીસ અને વહીવટી તંત્રને બચાવ કાર્યમાં પૂરો સહયોગ આપ્યો હતો. બંજરના ધારાસભ્ય સુરેન્દ્ર શૌરી સહિતના ઉચ્ચ અધિકારીઓ પણ ઘટનાસ્થળે દોડી ગયા હતા અને સમગ્ર પરિસ્થિતિ પર નજર રાખી રહ્યા છે. મોડી રાત સુધી રેસ્ક્યુ ઓપરેશન ચાલુ રહ્યું હતું જેથી કોઈ અન્ય મુસાફર ખીણમાં ફસાયેલો ન હોય તેની ખાતરી કરી શકાય. આ દુર્ઘટનાને પગલે પ્રવાસન ક્ષેત્રમાં શોકની લહેર પ્રસરી ગઈ છે.