વિન્ડસર (કનેક્ટિકટ), તા.૬: અમેરિકાના કનેક્ટિકટ અને તેની આસપાસના વિસ્તારોમાં રહેતા ભારતીય સમુદાય માટે રાહતના સમાચાર આવ્યા છે. ન્યૂ યોર્ક સ્થિત ભારતીય કોન્સ્યુલેટ જનરલ દ્વારા આગામી ૧૮ એપ્રિલ, ૨૦૨૬ના રોજ વિન્ડસરમાં એક વિશેષ 'કોન્સ્યુલર કેમ્પ'નું આયોજન કરવામાં આવ્યું છે. 'કોન્સ્યુલેટ @ યોર ડોરસ્ટેપ' (તમારા ઘરઆંગણે કોન્સ્યુલેટ) પહેલ હેઠળ આયોજિત આ કેમ્પનો હેતુ ભારતીય નાગરિકોને તેમની કોન્સ્યુલર સેવાઓ માટે ન્યૂ યોર્ક સુધી લાંબા ધક્કા ખાવામાંથી મુક્તિ અપાવવાનો છે.
ક્યાં અને ક્યારે યોજાશે કેમ્પ?
આ કેમ્પ મિલાન કલ્ચરલ એસોસિએશન અને VFS ગ્લોબલના સહયોગથી વિન્ડસરના ૧૫૩૦ પેલિસાડો એવન્યુ સ્થિત ગુરુદ્વારા દુઃખ નિવારન સાહિબ ખાતે યોજાશે. કેમ્પનો સમય સવારે ૧૦:૦૦ થી બપોરે ૩:૦૦ વાગ્યા સુધીનો રહેશે. નોંધનીય છે કે આ સેવા માત્ર એવા જ અરજદારો માટે છે જેઓ ન્યૂ યોર્ક કોન્સ્યુલેટના અધિકારક્ષેત્રમાં આવે છે.
કઈ સેવાઓ ઉપલબ્ધ રહેશે?
કેમ્પમાં હાજર રહેલા VFS ગ્લોબલના પ્રતિનિધિઓ નીચે મુજબની વિવિધ સેવાઓ માટે રૂબરૂ અરજીઓ સ્વીકારશે અને તેની ચકાસણી કરશે:
•    નવો પાસપોર્ટ અથવા પાસપોર્ટ રિન્યુઅલ
•    ઓવરસીઝ સિટિઝનશિપ ઓફ ઇન્ડિયા (OCI) કાર્ડ
•    સરેન્ડર સર્ટિફિકેટ (ભારતીય નાગરિકત્વ છોડવા માટે)
•    પોલીસ ક્લિયરન્સ સર્ટિફિકેટ (PCC)
•    વિવિધ કેટેગરીના વિઝા અને ગ્લોબલ એન્ટ્રી પ્રોગ્રામ (GEP)
હાજર રહેતા પહેલા આટલું ચોક્કસ કરજો
કેમ્પનો લાભ લેવા માંગતા અરજદારોએ કેટલીક પૂર્વ-તૈયારીઓ કરવી પડશે. સૌ પ્રથમ, ભારત સરકારના સત્તાવાર પોર્ટલ પર જઈને ઓનલાઈન ફોર્મ ભરવાનું રહેશે. ત્યારબાદ VFS ગ્લોબલની વેબસાઇટ પર પ્રોફાઇલ બનાવી, જરૂરી ફી ચૂકવીને પેમેન્ટની રિસીપ્ટ મેળવવી પડશે. સૌથી મહત્વની વાત એ છે કે, આ કેમ્પમાં સેવા મેળવવા માટે એપોઇન્ટમેન્ટ લેવી ફરજિયાત છે. અરજદારે પોતાના ફોર્મની પ્રિન્ટઆઉટ, ઓરિજિનલ દસ્તાવેજો અને ચેકલિસ્ટ મુજબના પુરાવાઓ સાથે રાખવા પડશે.
સલામતી અને સંપર્ક
કેમ્પ દરમિયાન આરોગ્ય અને સુરક્ષાના તમામ નિયમોનું પાલન કરવું જરૂરી રહેશે. અરજીની સ્થિતિ (Status) ઓનલાઈન ટ્રેક કરી શકાશે, તેમજ ઈમેલ અથવા SMS દ્વારા પણ અપડેટ્સ આપવામાં આવશે. જો કોઈને આ બાબતે વધુ પૂછપરછ કરવી હોય, તો તેઓ મિલાન કલ્ચરલ એસોસિએશનનો [email protected] પર સંપર્ક કરી શકે છે.
વિન્ડસરમાં યોજાનારો આ કેમ્પ કનેક્ટિકટના ભારતીય મૂળના લોકો માટે સરકારી પ્રક્રિયાઓને સરળ બનાવવાની એક ઉત્તમ તક છે. 18 એપ્રિલની તારીખ ડાયરીમાં નોંધી લેજો અને વહેલી તકે એપોઇન્ટમેન્ટ બુક કરાવી લેજો!