નવી ડિલ્હી : દિલ્હીના ભૂતપૂર્વ મુખ્યમંત્રી અરવિંદ કેજરીવાલ અને ન્યાયતંત્ર વચ્ચેનો સંઘર્ષ હવે એક નવા તબક્કે પહોંચ્યો છે. રવિવારે કેજરીવાલે દિલ્હી હાઈકોર્ટમાં એક સનસનાટીભરી અરજી દાખલ કરીને માંગ કરી છે કે દિલ્હી દારૂ નીતિ કેસની સુનાવણીમાંથી જસ્ટિસ સ્વર્ણ કાંતા શર્મા પોતે જ ખસી જાય (Recusal). કેજરીવાલનો દાવો છે કે આ કેસમાં તેમને નિષ્પક્ષ ન્યાય મળે તેવી શક્યતા જણાતી નથી.
કેજરીવાલને શા માટે છે વાંધો?
કેજરીવાલ અને આમ આદમી પાર્ટીના નેતાઓનો મુખ્ય તર્ક એ છે કે જસ્ટિસ શર્માનું વલણ શરૂઆતથી જ તેમના પ્રત્યે ‘પૂર્વગ્રહયુક્ત’ રહ્યું છે. ૧૧ માર્ચે કરવામાં આવેલી રજૂઆતમાં કેજરીવાલે જણાવ્યું હતું કે, સીબીઆઈની અપીલના પહેલા જ દિવસે જસ્ટિસ શર્માએ બચાવ પક્ષને સાંભળ્યા વિના જ ટ્રાયલ કોર્ટના નિર્ણયને ‘ભૂલભર્યો’ ગણાવી દીધો હતો. જણાવી દઈએ કે ૨૭ ફેબ્રુઆરીના રોજ ટ્રાયલ કોર્ટે કેજરીવાલ, સિસોદિયા સહિત ૨૩ આરોપીઓને પુરાવાના અભાવે નિર્દોષ જાહેર કર્યા હતા.
કોણ છે જસ્ટિસ સ્વર્ણ કાંતા શર્મા?
જસ્ટિસ સ્વર્ણ કાંતા શર્મા ૨૮ માર્ચ, ૨૦૨૨થી દિલ્હી હાઈકોર્ટમાં કાયમી ન્યાયાધીશ તરીકે ફરજ બજાવે છે. તેઓ અત્યંત શિક્ષિત છે અને કાયદાના ક્ષેત્રમાં Ph.D. ધરાવે છે. ૨૪ વર્ષની નાની ઉંમરે મેજિસ્ટ્રેટ તરીકે કારકિર્દી શરૂ કરનાર જસ્ટિસ શર્માએ મહિલા અધિકારો અને વરિષ્ઠ નાગરિકો માટે પુસ્તકો પણ લખ્યા છે. જોકે, દારૂ નીતિ કેસમાં સીબીઆઈના તપાસ અધિકારી સામેની કાર્યવાહી પર સ્ટે મૂકવાના તેમના નિર્ણયથી કેજરીવાલ નારાજ છે.
શું છે દારૂ નીતિનો ?
આ કેસ વર્ષ ૨૦૨૧-૨૨ની દિલ્હીની આબકારી નીતિ સાથે જોડાયેલો છે, જેમાં દારૂના વેપારનું ખાનગીકરણ કરવામાં આવ્યું હતું. તપાસ એજન્સીઓનો આરોપ છે કે ‘સાઉથ ગ્રુપ’ નામના વેપારીઓના જૂથને ફાયદો કરાવવા માટે ૧૦૦ કરોડની લાંચ લેવામાં આવી હતી અને તે પૈસાનો ઉપયોગ ચૂંટણી પ્રચારમાં થયો હતો. આ કેસમાં કેજરીવાલ ૫ મહિના અને મનીષ સિસોદિયા ૧૭ મહિના જેલમાં રહી ચૂક્યા છે.
ભાજપે કરી ટીકા
બીજી તરફ ભાજપે કેજરીવાલના આ પગલાની આકરી ટીકા કરી છે. દિલ્હી ભાજપના પ્રવક્તાએ કહ્યું કે, “આ ન્યાયિક પ્રણાલી પ્રત્યે અનાદર દર્શાવે છે. કેજરીવાલ તમામ મોરચે હારી ચૂક્યા છે એટલે હવે જજ બદલવાની રમત રમી રહ્યા છે.”
આગામી સુનાવણી પર સૌની નજર
૬ એપ્રિલ, ૨૦૨૬ના રોજ કેજરીવાલ પોતે હાઈકોર્ટમાં હાજર રહીને આ મામલે દલીલો કરવાના છે. જો જસ્ટિસ શર્મા આ કેસમાંથી ખસી જવાનો નિર્ણય લેશે, તો કેસ નવી બેંચ પાસે જશે. પરંતુ જો તેઓ ના પાડશે, તો કાનૂની લડાઈ વધુ જટિલ બનશે. દિલ્હીના રાજકારણમાં આ વિવાદ અત્યારે ચર્ચાના કેન્દ્રમાં છે.