પુડુચેરી : કેન્દ્રશાસિત પ્રદેશ પુડુચેરીના દરિયાકાંઠાને આર્થિક શક્તિમાં બદલવા માટે કેન્દ્ર સરકારે કમર કસી છે. ભાજપના વરિષ્ઠ નેતા અને કેન્દ્રીય ગૃહમંત્રી અમિતભાઈ શાહે આજે તિરુક્કન્નુર ખાતે એક ભવ્ય ચૂંટણી સભાને સંબોધતા જાહેરાત કરી હતી કે પુડુચેરીમાં ટૂંક સમયમાં એક વિશાળ ઔદ્યોગિક કોરિડોર વિકસાવવામાં આવશે. આ સાથે જ પ્રદેશને ‘બ્લુ ઇકોનોમી હબ’ (દરિયાઈ સંસાધનો આધારિત અર્થતંત્ર) તરીકે વિકસાવવાની યોજના પર પણ તેજ ગતિએ કામ ચાલી રહ્યું છે.
લેપટોપ મેન્યુફેક્ચરિંગમાં પુડુચેરીનું મોટું કદમ
વિકાસના કામોની યાદી આપતા અમિતભાઈ શાહે જણાવ્યું કે, કેન્દ્રના સહયોગથી પુડુચેરીમાં વાર્ષિક ૩ લાખ યુનિટની ઉત્પાદન ક્ષમતા ધરાવતું લેપટોપ મેન્યુફેક્ચરિંગ યુનિટ સ્થાપિત કરવામાં આવ્યું છે. આ એકમથી માત્ર ટેકનોલોજી ક્ષેત્રે જ નહીં, પરંતુ સ્થાનિક યુવાનો માટે રોજગારીની નવી તકો પણ ઉભી થઈ છે. તેમણે ભારપૂર્વક કહ્યું કે NDA સરકાર પુડુચેરીને દરેક ક્ષેત્રમાં મોડેલ પ્રદેશ બનાવવા માંગે છે.
બેરોજગારીના આંકડા પર મોટો દાવો
રોજગારના મુદ્દે અગાઉની કોંગ્રેસ સરકારને આડે હાથ લેતા અમિતભાઈ શાહે સનસનાટીભર્યો આરોપ લગાવ્યો હતો. તેમણે કહ્યું કે વી. નારાયણસામીના શાસનકાળ દરમિયાન પુડુચેરીમાં બેરોજગારીનો દર ૪૭% સુધી પહોંચી ગયો હતો, જેણે હજારો યુવાનોનું ભવિષ્ય અંધકારમાં ધકેલી દીધું હતું. જોકે, NDA સરકારના પ્રયાસો અને કેન્દ્રના મજબૂત ટેકાને કારણે આજે આ દર નોંધપાત્ર રીતે ઘટીને માત્ર ૪.૩% રહી ગયો છે.
“કોંગ્રેસે પછાતપણા તરફ ધકેલ્યું, અમે વિકાસ તરફ”
મન્નાડીપેટ મતવિસ્તારના ભાજપના ઉમેદવારના સમર્થનમાં પ્રચાર કરતા અમિતભાઈ શાહે કોંગ્રેસ પર આકરા પ્રહાર કર્યા હતા. તેમણે કહ્યું કે અગાઉની સરકારોએ પુડુચેરીના વિકાસમાં કોઈ રસ દાખવ્યો નહોતો, જ્યારે મોદી સરકારના નેતૃત્વમાં આજે આ નાનો પ્રદેશ રાષ્ટ્રીય ફલક પર પોતાની નવી ઓળખ બનાવી રહ્યો છે. ઔદ્યોગિક કોરિડોર અને બ્લુ ઇકોનોમી જેવા પ્રોજેક્ટ્સ પુડુચેરીની અર્થવ્યવસ્થાની કાયાપલટ કરી નાખશે.
આ ચૂંટણી સભામાં ઉમટેલી મેદની અને અમિતભાઈ શાહના વિકાસના એજન્ડાએ પુડુચેરીના રાજકીય માહોલમાં ગરમાવો લાવી દીધો છે. હવે જોવાનું એ રહેશે કે આગામી સમયમાં આ ઔદ્યોગિક પ્રોજેક્ટ્સ પુડુચેરીના નસીબ કેટલા બદલે છે.