બેઇજિંગ:  જ્યારે વિશ્વનું ધ્યાન ઈરાન-ઈઝરાયેલ સંઘર્ષ પર કેન્દ્રિત છે, ત્યારે ચીને એશિયા-પેસિફિક ક્ષેત્રમાં એક અત્યંત ખતરનાક ચાલ ચાલી છે. કોઈ પણ સત્તાવાર જાહેરાત કે લશ્કરી કવાયતના બહાના વગર, ચીને તેના પૂર્વીય સમુદ્ર કિનારાના વિશાળ હવાઈ ક્ષેત્રને સતત 40 દિવસ માટે બંધ કરી દીધું છે. આ પ્રતિબંધિત વિસ્તાર દક્ષિણ કોરિયાના પીળા સમુદ્રથી લઈને જાપાન નજીકના પૂર્વ ચીન સમુદ્ર સુધી ફેલાયેલો છે. સંરક્ષણ નિષ્ણાતો માને છે કે આટલા લાંબા સમય સુધી આકાશને અવરોધિત કરવું એ ચીનની નવી મિસાઈલ ટેકનોલોજીના પરીક્ષણ અથવા તાઇવાન પર સંભવિત હુમલાની પૂર્વ તૈયારી હોઈ શકે છે.

અમેરિકા માટે આ સ્થિતિ ‘બેવડા જોખમ’ સમાન છે. યુએસ સૈન્ય અત્યારે ઈરાન સામેના યુદ્ધમાં વ્યસ્ત છે, ત્યારે ચીને વ્યૂહાત્મક રીતે આ સમય પસંદ કર્યો છે. આ હવાઈ ‘લોકડાઉન’ ને કારણે જાપાન, દક્ષિણ કોરિયા અને ગુઆમ સ્થિત અમેરિકી બેઝ પરથી ઉડતા જાસૂસી વિમાનો અને બોમ્બર્સ માટે મુશ્કેલી ઊભી થઈ છે. હવે અમેરિકન વિમાનોએ લાંબા રૂટ લેવા પડશે, જેનાથી ઇંધણ અને સમયનો વ્યય થશે. સૌથી ચિંતાજનક બાબત એ છે કે 40 દિવસ સુધી અમેરિકા ચીનની લશ્કરી હિલચાલ પર સીધી નજર રાખી શકશે નહીં, જે ડ્રેગનને કોઈ પણ મોટી ગુપ્ત કાર્યવાહી માટે મોકળું મેદાન પૂરું પાડે છે.

ચીનનો સ્પષ્ટ લક્ષ્ય 2027 સુધીમાં તાઇવાનને પોતાનામાં ભેળવી દેવાનો છે અને આ તાજેતરનું પગલું તે દિશામાં મજબૂત પકડ જમાવવાનો સંકેત છે. પેન્ટાગોન હવે મધ્ય પૂર્વ અને એશિયા એમ બંને મોરચે પોતાના સંસાધનો વહેંચવા મજબૂર બન્યું છે. તાઇવાનના સુરક્ષા અધિકારીઓએ ચેતવણી આપી છે કે ચીન ધીમે ધીમે આ ક્ષેત્રમાં પોતાની લશ્કરી સર્વોપરિતા સ્થાપિત કરી રહ્યું છે. જો અમેરિકા ઈરાન યુદ્ધમાં વધુ ઊંડું ઉતરશે, તો ચીન આ તકનો ઉપયોગ કરીને તાઇવાનની સ્વતંત્રતા પર આખરી પ્રહાર કરી શકે છે, જે સમગ્ર વિશ્વને ત્રીજા વિશ્વયુદ્ધ તરફ ધકેલી દેશે.