નવી દિલ્‍હીઃ ઈરાન સાથેના યુદ્ધ જેવા વૈશ્વિક તણાવ બાદ ઊર્જા ક્ષેત્રમાં ઉથલપાથલ જોવા મળી રહી છે, જેના પ્રભાવથી LPG પુરવઠા પર પણ અસર પડી હતી. વાસ્‍તવમાં આવી પરિસ્‍થિતિમાં ભારત સરકારે ઝડપી પગલાં લઈને સામાન્‍ય જનતા અને ખાસ કરીને સ્‍થળાંતરિત કામદારોને રાહત આપવા માટે મહત્‍વપૂર્ણ જાહેરાત કરી છે.

સરકારના નિર્ણય અનુસાર સ્‍થળાંતરિત કામદારો માટે ઉપલબ્‍ધ ૫ કિલોના ફ્રી ટ્રેડ LPG (FTL) સિલિન્‍ડરોની દૈનિક ઉપલબ્‍ધતા હવે બમણી કરવામાં આવશે. આ વધારાનો પુરવઠો રાજ્‍ય સરકારો અને તેમના નાગરિક પુરવઠા વિભાગો મારફતે પહોંચાડવામાં આવશે. આ સમગ્ર પ્રક્રિયામાં ઓઇલ માર્કેટીંગ કંપનીઓ મુખ્‍ય ભૂમિકા ભજવશે અને સીધા લાભાર્થીઓ સુધી સિલિન્‍ડર પહોંચાડશે.

આ પગલાનો મુખ્‍ય હેતુ સ્‍થળાંતરિત કામદારોને સરળતાથી રસોઈ ગેસ ઉપલબ્‍ધ કરાવવાનો છે. વધારેલા પુરવઠાથી રોજિંદા વેચાણ ૧ લાખથી વધુ સિલિન્‍ડર સુધી પહોંચવાની શકયતા છે. સરકારી આંકડાઓ મુજબ, ૨૩ માર્ચથી અત્‍યાર સુધીમાં આશરે ૬.૬ લાખ ૫ કિલોના સિલિન્‍ડરોનું વિતરણ થઈ ચૂકયું છે.

પેટ્રોલિયમ અને કુદરતી ગેસ મંત્રાલય મુજબ, નાના ૫ કિલોના FTL સિલિન્‍ડર બજાર ભાવ પર ઉપલબ્‍ધ છે અને તેને મેળવવા માટે સરનામાનો પુરાવો જરૂરી નથી. LPG વિતરણ વ્‍યવસ્‍થામાં કોઈ મોટી અછત નોંધાઈ નથી. એક દિવસમાં ૫.૧ મિલિયનથી વધુ ઘરેલુ સિલિન્‍ડર સપ્‍લાય કરવામાં આવ્‍યા હતા અને તેમાંના લગભગ ૯૫ ટકા ઓર્ડર ઓનલાઈન બુકિંગ દ્વારા પૂર્ણ થયા હતા.