કિવ, તા.7: પશ્ચિમ એશિયામાં સળગી રહેલી યુદ્ધની આગમાં હવે એક નવો અને ભયાનક વળાંક આવ્યો છે. યુક્રેનિયન ગુપ્તચર એજન્સીઓએ એક સનસનાટીભર્યો ખુલાસો કરતા જણાવ્યું છે કે, રશિયા તેના અત્યાધુનિક સેટેલાઈટ અને સાયબર શક્તિનો ઉપયોગ કરીને ઈરાનને લશ્કરી મદદ કરી રહ્યું છે. આ મદદને કારણે જ ઈરાન અમેરિકી સૈન્ય મથકો અને અન્ય મહત્વના ઠેકાણાઓ પર પિન-પોઈન્ટ ચોકસાઈ સાથે બેલિસ્ટિક મિસાઈલો અને ડ્રોન હુમલા કરી શક્યું છે.
રશિયન ઉપગ્રહોની શંકાસ્પદ હિલચાલ
અહેવાલ મુજબ, 21 થી 31 માર્ચ દરમિયાન રશિયન ઉપગ્રહોએ મધ્ય પૂર્વના 11 દેશો પર આકાશમાંથી બાજ નજર રાખી હતી. આ દરમિયાન 24 થી વધુ વખત વિગતવાર સર્વેક્ષણો કરવામાં આવ્યા, જેમાં અમેરિકી લશ્કરી બેઝ, એરપોર્ટ અને તેલ ક્ષેત્રો સહિતના 46 વ્યૂહાત્મક સ્થળોની હાઈ-ક્વોલિટી તસવીરો લેવામાં આવી હતી. નવાઈની વાત એ છે કે, આ સર્વેક્ષણના ગણતરીના દિવસોમાં જ ઈરાને તે જ સ્થળો પર હુમલા કર્યા હતા.
કયા દેશો પર હતી નજર?
યુક્રેનના અહેવાલ મુજબ, રશિયાએ ખાસ કરીને સાઉદી અરેબિયાના કિંગ ખાલિદ મિલિટરી સિટી પર ધ્યાન કેન્દ્રિત કર્યું હતું જેથી ત્યાં તૈનાત અમેરિકાની THAAD એર ડિફેન્સ સિસ્ટમનું ચોક્કસ લોકેશન જાણી શકાય. આ ઉપરાંત તુર્કી, જોર્ડન, કુવૈત, સંયુક્ત આરબ અમીરાત (UAE), ઇઝરાયેલ, કતાર, ઇરાક અને બહેરીનના સંવેદનશીલ વિસ્તારોની માહિતી પણ ઈરાન સાથે શેર કરવામાં આવી હોવાનો દાવો છે.
હોર્મુઝ અને સાયબર વોરફેર
માત્ર જમીની સ્થળો જ નહીં, પણ રશિયા હોર્મુઝની સામુદ્રધુની (Strait of Hormuz) પર પણ સતત દેખરેખ રાખી રહ્યું છે, જ્યાંથી વિશ્વનો મોટાભાગનો તેલ અને LNG પુરવઠો પસાર થાય છે. અહેવાલમાં એમ પણ કહેવાયું છે કે તેહરાનમાં તૈનાત રશિયન લશ્કરી એજન્ટો દ્વારા એક કાયમી સંચાર ચેનલ સ્થાપિત કરવામાં આવી છે, જેના દ્વારા આ ગુપ્ત ડેટા રિયલ-ટાઈમમાં શેર કરવામાં આવે છે.
જોકે, અમેરિકાના વ્હાઇટ હાઉસે અત્યાર સુધી આ અહેવાલોને નકારી કાઢ્યા છે અને જણાવ્યું છે કે તેમની લશ્કરી કામગીરી કોઈ બાહ્ય દબાણ હેઠળ નથી. પરંતુ જો યુક્રેનનો આ દાવો સાચો સાબિત થાય, તો તે વૈશ્વિક સુરક્ષા માટે મોટો ખતરો બની શકે છે, કારણ કે તે બે શક્તિશાળી દેશો વચ્ચેના ખતરનાક લશ્કરી સંકલનનો પુરાવો આપે છે.