લખનૌ,: ઉત્તર પ્રદેશની રાજધાની લખનૌના હઝરતગંજ વિસ્તારમાં પોલીસે એક એવી ગેંગનો પર્દાફાશ કર્યો છે જે ખિસ્સા કાપવા માટે અનોખી અને જોખમી પદ્ધતિ અપનાવતી હતી. આ આંતરરાજ્ય ગેંગના ચાર સભ્યોની ધરપકડ કરવામાં આવી છે, જેઓ માસૂમ રાહદારીઓને પોતાની સાયકલથી ટક્કર મારી નીચે પાડી દેતા અને પછી મદદ કરવાના બહાને તેમના ખિસ્સામાંથી રોકડ રકમ સેરવી લેતા હતા. પોલીસની આ સફળતાથી શહેરના ભરચક વિસ્તારોમાં ફરતા લોકોએ રાહતનો શ્વાસ લીધો છે.
શું હતી આ ગેંગની 'ખતરનાક' મોડસ ઓપરેન્ડી?
એસીપી વિકાસ જયસ્વાલે જણાવ્યું કે, આ ગેંગ ખૂબ જ વ્યવસ્થિત રીતે કામ કરતી હતી. ગેંગનો એક સભ્ય સાયકલ લઈને આવતા-જતા રાહદારીને જાણીજોઈને ટક્કર મારતો, જેના કારણે પીડિત જમીન પર પડી જતો. તરત જ પાછળ આવતા ગેંગના અન્ય સભ્યો મદદ કરવાના બહાને પીડિતને ઉભો કરતા અને એ જ અંધાધૂંધીમાં તેના ખિસ્સામાંથી પૈસા અને કિંમતી સામાન ચોરી લેતા હતા. ભીડનો લાભ લઈને તેઓ મિનિટોમાં ત્યાંથી ગાયબ થઈ જતા હતા.
50,000ની ચોરી બાદ પોલીસ એક્શનમાં
આ મામલો ત્યારે પ્રકાશમાં આવ્યો જ્યારે ઈન્દિરાનગરના રહેવાસી બલરામ સાધવાનીએ ફરિયાદ નોંધાવી કે ગત 16 માર્ચે બે શખ્સોએ તેમને સાયકલથી પાડી દીધા હતા અને મદદ કરવાના બહાને તેમના ખિસ્સામાંથી ₹50,000 કાઢી લીધા હતા. પોલીસે તપાસ માટે બે ટીમો બનાવી હતી અને મંગળવારે મુરાદાબાદના રહેવાસી એવા ચાર આરોપીઓ - બિસરત, વસીમ ઉર્ફે શાહિલ, અરુણ કુમાર અને સચિન ચૌહાણને દબોચી લીધા હતા.
પોલીસે શું જપ્ત કર્યું?
ધરપકડ કરાયેલા આરોપીઓ પાસેથી પોલીસે ₹3,673ની રોકડ, LICની રસીદો અને ગુનામાં વપરાયેલી સાયકલ જપ્ત કરી છે. આ ટોળકી લખનૌ અને તેની આસપાસના જિલ્લાઓમાં સક્રિય હતી અને અનેક લોકોને શિકાર બનાવી ચૂકી છે. હાલમાં પોલીસે તમામ આરોપીઓને જેલ હવાલે કર્યા છે અને આ ગેંગના અન્ય સભ્યોની શોધખોળ તેજ કરી છે.