ન્યૂયોર્ક: અમેરિકી રાષ્ટ્રપતિ ડોનાલ્ડ ટ્રમ્પે ઈરાન સાથે ૨ સપ્તાહના "દ્વિપક્ષીય યુદ્ધવિરામ"ની જાહેરાત કરી છે. પાકિસ્તાનના વડાપ્રધાન શહેબાઝ શરીફની મધ્યસ્થી બાદ લેવાયેલા આ નિર્ણય હેઠળ, જો ઈરાન હોર્મુઝની સામુદ્રધુનીને સંપૂર્ણ, તાત્કાલિક અને સુરક્ષિત રીતે ખોલવા સંમત થશે, તો અમેરિકા કોઈ સૈન્ય કાર્યવાહી કરશે નહીં. ટ્રમ્પે જણાવ્યું છે કે અમેરિકાએ તેના તમામ સૈન્ય લક્ષ્યાંકો હાંસલ કરી લીધા છે અને લાંબા ગાળાના શાંતિ કરારની દિશામાં બંને દેશો ઘણું આગળ વધી ચૂક્યા છે. આ સકારાત્મક સમાચારને પગલે ગિફ્ટ નિફ્ટીમાં ૬૯૩ પોઈન્ટનો (૩%) ઉછાળો જોવા મળ્યો હતો.

આંતરરાષ્ટ્રીય સમાચાર માધ્યમોના અહેવાલો અનુસાર, રાષ્ટ્રપતિ ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ પર જાહેરાત કરી હતી કે તેઓ ઈરાન પરના હુમલાઓ ૨ સપ્તાહ માટે અટકાવી રહ્યા છે. આ નિર્ણય પાકિસ્તાનના વડાપ્રધાન શહેબાઝ શરીફ અને સેના પ્રમુખ જનરલ અસીમ મુનીરની અપીલ બાદ લેવામાં આવ્યો છે. આ યુદ્ધવિરામનો મુખ્ય આધાર ઈરાન દ્વારા વૈશ્વિક વેપાર અને ખનીજ તેલના પુરવઠા માટે અત્યંત મહત્વપૂર્ણ એવી હોર્મુઝની સામુદ્રધુનીને ફરીથી સુરક્ષિત રીતે શરૂ કરવા પર રહેલો છે.

ટ્રમ્પે આ સમજૂતીને "દ્વિપક્ષીય યુદ્ધવિરામ" ગણાવ્યો છે અને સ્પષ્ટ કર્યું છે કે અમેરિકાએ તેની સૈન્ય કાર્યવાહીના તમામ લક્ષ્યાંકો પૂરા કરી લીધા છે. ઈરાન દ્વારા શાંતિ માટે એક ૧૦-મુદ્દાનો પ્રસ્તાવ સોંપવામાં આવ્યો છે, જેને ટ્રમ્પે વાટાઘાટો માટેનો "વ્યવહારુ આધાર" ગણાવ્યો છે. રાષ્ટ્રપતિના મતે, અગાઉના મોટાભાગના વિવાદાસ્પદ મુદ્દાઓ પર બંને દેશો વચ્ચે સૈદ્ધાંતિક સહમતિ સધાઈ ચૂકી છે, અને આ ૨ સપ્તાહનો સમયગાળો અંતિમ શાંતિ કરારને આખરી ઓપ આપવા માટે પૂરતો છે. અમેરિકા તરફથી વાટાઘાટોમાં ઉપરાષ્ટ્રપતિ જેડી વેન્સ મુખ્ય ભૂમિકા ભજવી હતી.

બીજી તરફ, ઈરાનની સુપ્રીમ નેશનલ સિક્યુરિટી કાઉન્સિલે પણ આ યુદ્ધવિરામને સ્વીકારી લીધો છે. ઈરાનના વિદેશ મંત્રીએ ખાતરી આપી છે કે આ સમયગાળા દરમિયાન ઈરાની સશસ્ત્ર દળોના સંકલન સાથે હોર્મુઝની સામુદ્રધુનીમાંથી જહાજોની સુરક્ષિત અવરજવર શક્ય બનશે. આ વૈશ્વિક ભૌગોલિક-રાજકીય તણાવ હળવો થવાની સીધી સકારાત્મક અસર શેરબજારો પર પડી છે અને આંતરરાષ્ટ્રીય બજારમાં ક્રૂડ ઓઈલના ભાવમાં પણ મોટો ઘટાડો નોંધાયો છે, જેના પરિણામે ગિફ્ટ નિફ્ટી ૬૯૩ પોઈન્ટ (૩ ટકા) ઉછળીને ખુલવાના સંકેત દર્શાવી રહ્યો છે. મધ્યપૂર્વમાં કાયમી શાંતિ સ્થાપવા માટે આ પગલું અત્યંત નિર્ણાયક માનવામાં આવે છે.