નવી દિલ્હી : અમેરિકા અને ઈરાન વચ્ચેના બે અઠવાડિયાના યુદ્ધવિરામને લઈને ઈરાને આક્રમક વલણ અપનાવ્યું છે. ભારતમાં ઈરાનના સુપ્રીમ લીડરના ખાસ પ્રતિનિધિ અબ્દુલ મજીદ હકીમ ઇલાહીએ દાવો કર્યો છે કે યુનાઇટેડ સ્ટેટ્સે યુદ્ધવિરામની જાહેરાત સ્વૈચ્છિક રીતે નથી કરી, પરંતુ લડાઈ ચાલુ રાખવામાં તેની અસમર્થતા અને સંભવિત હારના ડરથી તેને આ નિર્ણય લેવાની ફરજ પડી છે. નવી દિલ્હીમાં એક ખાસ વાતચીત દરમિયાન તેમણે વોશિંગ્ટનની વ્યૂહાત્મક નિષ્ફળતા પર નિશાન સાધ્યું હતું.
યુદ્ધ ઈરાન પર લાદવામાં આવ્યું હતું
ઇલાહીએ સ્પષ્ટ કર્યું હતું કે ઈરાન ક્યારેય આ યુદ્ધ ઈચ્છતું નહોતું. તેમણે કહ્યું, "આ સંઘર્ષ અમારા પર લાદવામાં આવ્યો હતો. અમે આંતરરાષ્ટ્રીય કાયદાઓ અને માનવતાના ધોરણે હંમેશા નાગરિકો પર હુમલો કરવાનું ટાળ્યું છે. અમેરિકાએ છેલ્લા 41 દિવસમાં મોટી ભૂલો કરી અને જ્યારે તેમને સમજાયું કે તેઓ વધુ આંચકા સહન કરી શકે તેમ નથી, ત્યારે તેમણે વિરામની જાહેરાત કરી." તેમણે વધુમાં ઉમેર્યું કે જો અમેરિકા ઈરાનની શરતો સ્વીકારશે તો જ આ શાંતિ કાયમી બની શકશે.
પરમાણુ હથિયારો અંગે સ્પષ્ટતા
ઈરાનની પરમાણુ મહત્વાકાંક્ષાઓ અંગેના પશ્ચિમી દેશોના આરોપોને ફગાવતા ઇલાહીએ ધાર્મિક સિદ્ધાંતોનો ઉલ્લેખ કર્યો હતો. તેમણે ભારપૂર્વક જણાવ્યું કે ઈરાનના સર્વોચ્ચ નેતાએ પહેલેથી જ જાહેર કર્યું છે કે પરમાણુ શસ્ત્રો બનાવવો એ ઇસ્લામ ધર્મ મુજબ 'હરામ' (પ્રતિબંધિત) છે. ઈરાન ન તો અત્યારે અને ન તો ભવિષ્યમાં ક્યારેય આવા હથિયારો વિકસાવવા માંગે છે.
બાહ્ય હસ્તક્ષેપને ગણાવ્યો જવાબદાર
ગલ્ફ દેશો સાથેના તણાવ માટે ઇલાહીએ અમેરિકાના હસ્તક્ષેપને જવાબદાર ઠેરવ્યો હતો. તેમણે કહ્યું કે, "અમે હજારો વર્ષોથી પાડોશી દેશો સાથે શાંતિથી રહેતા હતા, પરંતુ હજારો માઇલ દૂરથી આવેલા અમેરિકાએ આ વિસ્તારમાં અસ્થિરતા લાવી છે. અમેરિકાએ અમારા પર હુમલો કરવા માટે પાડોશી આરબ દેશોમાં આવેલા પોતાના લશ્કરી ઠેકાણાઓનો ઉપયોગ કર્યો હતો. અમારી કાર્યવાહી માત્ર અમેરિકન સૈન્ય માળખા સામે જ હતી, અમે ક્યારેય પાડોશી દેશો કે નાગરિકોને નિશાન બનાવ્યા નથી."
ભારતમાં ઈરાનના પ્રતિનિધિનું આ નિવેદન એવા સમયે આવ્યું છે જ્યારે આગામી દિવસોમાં ઇસ્લામાબાદમાં બંને દેશો વચ્ચે નિર્ણાયક વાટાઘાટો થવાની છે. ઈરાનનું આ કડક વલણ દર્શાવે છે કે ટેબલ પર થનારી ચર્ચામાં તે પોતાની શરતો મનવાવવા માટે પૂરો પ્રયાસ કરશે.