નવીદિલ્હી: ભારત સરકાર દેશની આર્થિક અને રાષ્ટ્રીય સુરક્ષાને મજબૂત કરવા માટે એક ઐતિહાસિક પગલું ભરવાની તૈયારીમાં છે. પ્રધાનમંત્રી કાર્યાલય (પીએમઓ) સંરક્ષણ, બેન્કિંગ, ટેલિકોમ્યુનિકેશન અને ઊર્જા જેવા અત્યંત સંવેદનશીલ ક્ષેત્રોમાં કાર્યરત જાહેર હિતની સંસ્થાઓના ઓડિટમાંથી 'બિગ ફોર' વિદેશી ફર્મોને બાકાત રાખવા પર ગંભીરતાથી વિચાર કરી રહ્યું છે. 

આ નિર્ણય પાછળનો મુખ્ય ઉદ્દેશ્ય ડેટાની સુરક્ષા સુનિશ્ચિત કરવાનો અને વિદેશી કંપનીઓની પહોંચ મર્યાદિત કરવાનો છે. સરકારે આઇસીએઆઇને મજબૂત સ્થાનિક ઓડિટ ઇકોસિસ્ટમ વિકસાવવા, સ્થાનિક ડેટા સ્ટોરેજની વ્યવસ્થા કરવા અને ભારતીય સીએ ફર્મો માટે નિયમો સરળ બનાવવા પ્રસ્તાવ મૂકવા જણાવ્યું છે. 

આ અંગે ટૂંક સમયમાં અંતિમ નિર્ણય લેવામાં આવી શકે છે, જે દર્શાવે છે કે સરકાર હવે વ્યૂહાત્મક ઓડિટમાં સંપૂર્ણ સ્થાનિક નિયંત્રણ ઈચ્છે છે. આ નિર્ણયથી ભવિષ્યમાં પ્રમાણિક અને નાની ભારતીય સીએ ફર્મોને આગળ વધવાની મોટી તક મળશે.