લંડન : ઉત્તર સમુદ્રમાં બ્રિટનની મહત્વપૂર્ણ દરિયાઈ માળખાગત સુવિધાઓ નજીક રશિયન કામગીરીની આશંકાઓ વચ્ચે, બ્રિટનના સંરક્ષણ મંત્રાલયે ઇંગ્લિશ ચેનલમાંથી પસાર થતા રશિયન જહાજો પર પોતાની દેખરેખ અને સુરક્ષા વધારી દીધી છે.

બ્રિટનના સંરક્ષણ સચિવ જ્હોન હીલી દ્વારા કરવામાં આવેલી જાહેરાત બાદ આંતરરાષ્ટ્રીય જળસીમામાં તણાવ વધ્યો છે. ઉત્તર સમુદ્રમાં આવેલી યુનાઇટેડ કિંગડમની દરિયાઈ સપાટી નીચેની અત્યંત મહત્વની માળખાગત સુવિધાઓ નજીક રશિયાની શંકાસ્પદ સૈન્ય કામગીરી અંગે કડક ચેતવણી આપવામાં આવી હતી. 

આ જાહેરાત બાદ તરત જ, બ્રિટનના સંરક્ષણ મંત્રાલયે સત્તાવાર પુષ્ટિ કરી છે કે તેઓ અન્ય નાટો ભાગીદાર દેશો સાથે મળીને આ પરિસ્થિતિ પર ચાંપતી નજર રાખી રહ્યા છે. 

રિપોર્ટ્સ અનુસાર, રશિયન નેવીના યુદ્ધ જહાજ 'એડમિરલ ગ્રિગોરોવિચ'ની કડક સુરક્ષા હેઠળ ઇંગ્લિશ ચેનલમાંથી બે રશિયન જહાજો પસાર થઈ રહ્યા હતા, જેનો બ્રિટિશ દળો દ્વારા સતત પીછો કરવામાં આવ્યો હતો. આ ઘટના યુરોપિયન દરિયાઈ ક્ષેત્રમાં રશિયા અને પશ્ચિમી દેશો વચ્ચેની વધતી જતી સૈન્ય ગતિવિધિઓ અને અવિશ્વાસને સ્પષ્ટપણે દર્શાવે છે.