ન્યૂયોર્ક: રાષ્ટ્રપતિ ડોનાલ્ડ ટ્રમ્પે ટ્રુથ સોશિયલ પર એક લાંબી પોસ્ટમાં તેમના જૂના સમર્થકો અને રૂઢિચુસ્ત પત્રકારોની આકરી ઝાટકણી કાઢી છે, જેઓ હાલમાં ઈરાન સાથેના યુદ્ધ અને તેમની નીતિઓનો વિરોધ કરી રહ્યા છે.

અમેરિકન રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર એક અત્યંત આક્રમક પોસ્ટ કરીને રાજકીય વર્તુળોમાં ભારે ખળભળાટ મચાવી દીધો છે. 

ટ્રમ્પે તેમના એક સમયના સૌથી મજબૂત કન્ઝર્વેટિવ સમર્થકો જેવા કે ટકર કાર્લસન, મેગીન કેલી, કેન્ડિસ ઓવેન્સ અને એલેક્સ જોન્સ પર સીધો શાબ્દિક હુમલો કર્યો છે. આ પત્રકારો છેલ્લા કેટલાક સમયથી ઈરાન યુદ્ધ, એપ્સ્ટીન ફાઇલ્સ અને ટ્રમ્પની અન્ય નીતિઓની આકરી ટીકા કરી રહ્યા છે, જે તેમના મતે દેશના મૂળ એજન્ડા વિરુદ્ધ છે. 

ડોનાલ્ડ ટ્રમ્પે મીડિયા પંડિતો સામેનો પોતાનો ગુસ્સો ઠાલવતા તેમના અંગત જીવન અને ભૂતકાળની નિષ્ફળતાઓ પર સીધું નિશાન સાધ્યું છે. ટ્રમ્પે દાવો કર્યો કે પ્રખ્યાત પત્રકાર ટકર કાર્લસન ક્યારેય પોતાની કોલેજ પૂરી કરી શક્યા ન હતા અને એક ન્યૂઝ ચેનલમાંથી કાઢી મુકાયા બાદ તેઓ સંપૂર્ણપણે ભાંગી પડ્યા હતા. 

આ ઉપરાંત, તેમણે કેન્ડિસ ઓવેન્સની સખત ટીકા કરી, જેણે ફ્રાન્સના પ્રથમ મહિલા પર તેઓ પુરુષ હોવાનો વાહિયાત આક્ષેપ કર્યો હતો. ટ્રમ્પે ફ્રેન્ચ ફર્સ્ટ લેડીનો બચાવ કરતા તેમને અત્યંત સુંદર અને સન્માનનીય મહિલા ગણાવ્યા હતા. 

વધુમાં, ટ્રમ્પે સેન્ડી હૂક ગોળીબારની ઘટનાને ખોટી ગણાવનાર એલેક્સ જોન્સની પણ ઝાટકણી કાઢી અને કહ્યું કે તેણે પોતાની બધી જ સંપત્તિ ગુમાવી દીધી છે જે તેનો જ વાંક છે. ટ્રમ્પે આ તમામને ડાબેરી મીડિયાનું ધ્યાન ખેંચવા મથતા નિષ્ફળ લોકો ગણાવ્યા છે.

ટ્રમ્પે આ તમામ પત્રકારોને "ઓછા આઇક્યૂ વાળા, મૂર્ખ લોકો અને મુશ્કેલી ઊભી કરનારા" ગણાવ્યા છે. ટ્રમ્પે સ્પષ્ટ કર્યું છે કે આ લોકોના વિચારો તેમના સમર્થકોના વિચારોથી તદ્દન વિપરીત છે. આવા નિવેદનો દર્શાવે છે કે અમેરિકન રાજકારણમાં આંતરિક વિખવાદ હવે ચરમસીમા પર પહોંચી ગયો છે અને રૂઢિચુસ્ત વિચારધારા ધરાવતા જૂથોમાં સ્પષ્ટ ભાગલા પડી ગયા છે.