ન્યૂયોર્ક | તા.૧૦: અમેરિકા એટલે તકોની ભૂમિ, અને આ વાતને પાંચ ભારતીય મૂળના સપૂતોએ સાચી સાબિત કરી બતાવી છે. તાજેતરમાં 'ફોર્બ્સ' દ્વારા જાહેર કરવામાં આવેલી અમેરિકાના 250 મહાન સ્વ-નિર્મિત (Self-made) વ્યક્તિઓની યાદીમાં પાંચ ભારતીય-અમેરિકનોએ સ્થાન મેળવીને વિશ્વભરમાં ભારતનું નામ રોશન કર્યું છે. આ યાદી માત્ર સંપત્તિના આધારે નહીં, પરંતુ શૂન્યમાંથી સર્જન કરવાના સ્કોર (10 માંથી 9 કે 10 પોઈન્ટ્સ) ના આધારે તૈયાર કરવામાં આવી છે.
1. જય ચૌધરી: અંધકારથી સાયબર સિક્યોરિટીના આકાશ સુધી
યાદીમાં 47મા ક્રમે રહેલા ઝસ્કેલર (Zscaler) ના CEO જય ચૌધરીની વાર્તા પ્રેરણાનો સ્ત્રોત છે. ભારતનાં એક એવા અંતરિયાળ ગામમાં તેઓ ઉછર્યા હતા જ્યાં વીજળી કે નળના પાણીની સુવિધા પણ નહોતી. આજે તેઓ વિશ્વની સૌથી મોટી ક્લાઉડ સિક્યોરિટી કંપનીના માલિક છે.
2. હેમંત તનેજા: અભ્યાસ સાથે પરિવારનો ટેકો
53મા ક્રમે રહેલા હેમંત તનેજા 15 વર્ષની ઉંમરે અમેરિકા સ્થળાંતરિત થયા હતા. હાઈસ્કૂલના અભ્યાસની સાથે તેમણે પરિવારને આર્થિક મદદ કરવા માટે ફૂલ-ટાઈમ નોકરી કરી હતી. આજે તેઓ 'જનરલ કેટાલિસ્ટ' ના CEO તરીકે $36 અબજની સંપત્તિનું સંચાલન કરે છે.
3. રાજ સરદાણા: ખિસ્સામાં માત્ર $100 લઈને સફર શરૂ કરી
ઇનોવા સોલ્યુશન્સના સ્થાપક રાજ સરદાણા યાદીમાં 85મા ક્રમે છે. તેઓ ભારતમાં સરકાર દ્વારા અપાયેલા એક નાનકડા બેડરૂમવાળા ઘરમાં મોટા થયા હતા. 1980ના દાયકામાં જ્યારે તેઓ અમેરિકા ભણવા ગયા ત્યારે તેમની પાસે માત્ર $100 હતા. આજે તેમની નેટવર્થ $2 બિલિયનને આંબી ગઈ છે.
4. સુંદર પિચાઈ: મધ્યમ વર્ગનું સપનું અને ગુગલનું સુકાન
ગૂગલ અને આલ્ફાબેટના CEO સુંદર પિચાઈ 142મા ક્રમે છે. પિચાઈએ પોતે શેર કર્યું છે કે જ્યારે તેમને સ્ટેનફોર્ડ યુનિવર્સિટીમાં પ્રવેશ મળ્યો, ત્યારે તેમના પિતાએ તેમની વિમાન ટિકિટ માટે પોતાના આખા વર્ષનો પગાર ખર્ચ કરી નાખ્યો હતો. એ એક ટિકિટે આજે તેમને વિશ્વના સૌથી પ્રભાવશાળી ટેક લીડર બનાવી દીધા છે.
5. શ્યામ શંકર: નાદારીમાંથી અબજોપતિ સુધીની સફર
પલાન્ટિર (Palantir) ના ચીફ ટેકનોલોજી ઓફિસર શ્યામ શંકર 244મા ક્રમે છે. તેમના માતા-પિતાનો ડ્રાય ક્લિનિંગનો વ્યવસાય નાદાર થઈ ગયો હોવા છતાં, તેમણે હિંમત ન હારી અને ટેકનોલોજીની દુનિયામાં પોતાની ઓળખ બનાવી. આજે તેઓ $1 બિલિયનથી વધુની સંપત્તિના માલિક છે.
આ પાંચેય મહાનુભાવોની સફળતા એ વાતનું પ્રમાણ છે કે જો ઈરાદા મક્કમ હોય અને મહેનત કરવાની તૈયારી હોય, તો દુનિયાની કોઈ પણ મુશ્કેલી તમને સફળતા શિખર સર કરતા રોકી શકતી નથી.