લંડન | તા.૧૦: બ્રિટનની રાજધાની લંડન ફરી એકવાર ભારતીય સંસ્કૃતિના રંગોથી ઝળહળી ઉઠશે. લંડનના મેયર સાદિક ખાને આગામી ૧૮ એપ્રિલના રોજ વેસ્ટમિન્સ્ટરના ઐતિહાસિક ટ્રફાલ્ગર સ્ક્વેર ખાતે ભવ્ય વૈશાખી ઉજવણીનું એલાન કર્યું છે. ૧૬૯૯માં ગુરુ ગોવિંદ સિંહજી દ્વારા 'ખાલસા પંથ'ની સ્થાપનાની યાદમાં યોજાતો આ તહેવાર લંડનવાસીઓ માટે ભાઈચારો અને સંસ્કૃતિના મિલનનું કેન્દ્ર બનશે.
શૌર્ય અને સંસ્કૃતિનો અનોખો સંગમ
આ વર્ષની ઉજવણીમાં માત્ર સંગીત જ નહીં, પણ શીખ ધર્મની શૌર્યગાથા રજૂ કરતા અનેક આકર્ષણો હશે. કાર્યક્રમમાં:
•    ગટકા પ્રદર્શન: પરંપરાગત શીખ માર્શલ આર્ટના કરતબો જોવા મળશે.
•    પાઘડી બાંધવાની કળા: મુલાકાતીઓ શીખ સંસ્કૃતિના પ્રતીક સમાન પાઘડી બાંધતા શીખી શકશે.
•    રસોઈ શો અને લંગર: પંજાબના સ્વાદિષ્ટ વ્યંજનો અને મફત નાસ્તો-ચાની વ્યવસ્થા કરવામાં આવી છે.
તમામ પૃષ્ઠભૂમિના લોકો માટે ખુલ્લું આમંત્રણ
મેયર સાદિક ખાને સોશિયલ મીડિયા પ્લેટફોર્મ X પર ઉત્સાહ વ્યક્ત કરતા કહ્યું કે, "આ મહિને વૈશાખી ટ્રફાલ્ગર સ્ક્વેર પર પરત ફરી રહી છે. લંડનવાસીઓ અને પ્રવાસીઓ પરિવાર સાથે મફત મનોરંજન અને પરંપરાગત પંજાબી સંસ્કૃતિનો આનંદ માણી શકશે." આ કાર્યક્રમનો મુખ્ય ઉદ્દેશ્ય લંડનની વિવિધતાની ઉજવણી કરવાનો અને શીખ વારસાથી લોકોને માહિતગાર કરવાનો છે.
બપોરથી સાંજ સુધી જામશે મેળો
બપોરે ૧૨ વાગ્યાથી શરૂ થઈને સાંજના ૬ વાગ્યા સુધી ચાલનારા આ ઉત્સવમાં લોકપ્રિય રમતો, પાઘડીના સ્ટોલ અને મુખ્ય સ્ટેજ પર સાંસ્કૃતિક કલાકારોની પ્રસ્તુતિઓ આકર્ષણનું કેન્દ્ર રહેશે. વહીવટીતંત્રે એક વિડિયો સંદેશ દ્વારા યુવાનો અને પરિવારોને મોટી સંખ્યામાં જોડાવા અપીલ કરી છે.
લંડનના મેયર દ્વારા 'વૈશાખી લંડન' નામની બિન-લાભકારી સંસ્થાના સહયોગથી આ વાર્ષિક મહોત્સવનું આયોજન કરવામાં આવે છે, જે સાબિત કરે છે કે સાત સમંદર પાર પણ ભારતીય તહેવારોની ધૂમ હવે વૈશ્વિક બની રહી છે.