ઉત્તર દિનાજપુર: પશ્ચિમ બંગાળ વિધાનસભા ચૂંટણીના પડઘમ વાગી રહ્યા છે ત્યારે રાજકીય આક્ષેપ-પ્રતિઆક્ષેપોએ જોર પકડ્યું છે. આમ જનતા ઉન્નયન પાર્ટી (AJUP) ના વડા હુમાયુ કબીર એક કથિત "સ્ટિંગ વીડિયો" ને કારણે વિવાદોના વમળમાં ફસાયા છે. તૃણમૂલ કોંગ્રેસ (TMC) દ્વારા સોશિયલ મીડિયા પર શેર કરાયેલા આ વીડિયો બાદ હુમાયુ કબીરે શુક્રવારે વળતો પ્રહાર કરતા પશ્ચિમ બંગાળના મુખ્યમંત્રી મમતા બેનર્જી પર ગંભીર કાવતરું રચવાનો આરોપ લગાવ્યો છે.
૧૯ ડિસેમ્બરનો વીડિયો અત્યારે કેમ?
ઇસ્લામપુરમાં પત્રકારો સાથે વાત કરતા કબીરે સવાલ ઉઠાવ્યો હતો કે, "૧૯ ડિસેમ્બરનો વીડિયો ૮ એપ્રિલે કેમ વાયરલ કરવામાં આવી રહ્યો છે? મમતા બેનર્જી આટલા દિવસોથી શું કરી રહ્યા હતા?" તેમણે વધુમાં સનસનીખેજ આરોપ લગાવતા કહ્યું કે, મમતા બેનર્જી ભાજપ અને RSS સાથે સારા સંબંધો ધરાવે છે અને આ વીડિયો તેમને ફસાવવા માટે સાથે મળીને બનાવવામાં આવ્યો છે. તેમણે આ વીડિયોને AI (આર્ટિફિશિયલ ઇન્ટેલિજન્સ) દ્વારા બનાવેલો બનાવટી વીડિયો ગણાવ્યો છે.
AIMIM સાથેનું ગઠબંધન તૂટ્યું
આ વિવાદની સૌથી મોટી અસર રાજકીય મોરચે પડી છે. અસદુદ્દીન ઓવૈસીની પાર્ટી AIMIM એ તાત્કાલિક અસરથી AJUP સાથેનું ગઠબંધન તોડી નાખ્યું છે. TMC દ્વારા પોસ્ટ કરાયેલા વીડિયોમાં કબીર કથિત રીતે ૧,૦૦૦ કરોડ રૂપિયાના સોદાની વાત કરતા જોવા મળે છે. AIMIM એ જણાવ્યું કે, આવા નિવેદનો મુસ્લિમ સમુદાયની અખંડિતતા પર પ્રશ્ન ઉઠાવે છે, તેથી તેઓ આ જોડાણ ચાલુ રાખી શકે નહીં.
વિવાદોનો જૂનો નાતો
હુમાયુ કબીર અગાઉ મુર્શિદાબાદમાં બાબરી મસ્જિદના પ્રતીક સમાન મસ્જિદ બનાવવાના શિલાન્યાસને લઈને પણ વિવાદમાં આવ્યા હતા, જે બાદ તેમને TMC માંથી હાંકી કાઢવામાં આવ્યા હતા. બીજી તરફ, TMC ધારાસભ્ય અરિંદમ ગિને કબીરને "દેશદ્રોહી" ગણાવતા આક્ષેપ કર્યો છે કે તેઓ ભાજપ સાથે મળીને મુસ્લિમ મતોનું વિભાજન કરવાનું કામ કરી રહ્યા છે.
બંગાળમાં ચૂંટણીનો જંગ
પશ્ચિમ બંગાળની ૨૯૪ બેઠકો માટે રાજકીય જંગ જામ્યો છે. રાજ્યમાં ૨૩ એપ્રિલ અને ૨૯ એપ્રિલ એમ બે તબક્કામાં મતદાન યોજાશે, જ્યારે ૪ મેના રોજ પરિણામો જાહેર કરવામાં આવશે. ચૂંટણીના આ અંતિમ તબક્કામાં સ્ટિંગ વીડિયો અને ગઠબંધન તૂટવાની આ ઘટનાઓ મુસ્લિમ પ્રભુત્વ ધરાવતી બેઠકો પર નિર્ણાયક સાબિત થઈ શકે છે. હવે જોવાનું એ રહેશે કે હુમાયુ કબીર હાઈકોર્ટમાં કયા પુરાવા રજૂ કરે છે.