ધાર (મધ્યપ્રદેશ) : મધ્યપ્રદેશના ધાર જિલ્લામાં આવેલા ગોંડીખેડા ચારણ ગામમાં બનેલી મસાલા વેપારી દેવકૃષ્ણ પુરોહિતની હત્યાના મામલે હવે નવો વળાંક આવ્યો છે. આ હૃદયદ્રાવક ઘટનામાં પોતાના એકના એક દીકરાને ગુમાવનાર વૃદ્ધ માતાનો આક્રોશ ફાટી નીકળ્યો છે. એક વીડિયો સંદેશમાં શોકગ્રસ્ત માતાએ આરોપી પુત્રવધૂ પ્રિયંકા પુરોહિત માટે મૃત્યુદંડની માંગ કરી છે અને ચેતવણી આપી છે કે જો ન્યાય નહીં મળે તો તેઓ કાયદો હાથમાં લેતા અચકાશે નહીં.
"મારો એકનો એક સહારો છીનવી લીધો"
વીડિયોમાં ધ્રુસકે ધ્રુસકે રડતા માતાએ પોતાની વ્યથા ઠાલવતા કહ્યું કે, "હું છેલ્લા ૨૫ વર્ષથી વિધવા તરીકે એકલી જીવું છું. મેં ખૂબ જ સંઘર્ષ કરીને મારા પુત્ર દેવકૃષ્ણને ઉછેર્યો હતો. તે મારો એકમાત્ર સહારો હતો." તેમણે કડક શબ્દોમાં માંગણી કરી છે કે જે મહિલાએ તેમના પુત્રનો જીવ લીધો છે, તેને "મૃત્યુ સુધી ફાંસી" ની સજા મળવી જોઈએ.
પુત્રવધૂની શંકાસ્પદ વર્તણૂક પર ઉઠ્યા સવાલ
માતાએ હત્યાની ઘટના પર સવાલ ઉઠાવતા જણાવ્યું કે, ગુનો સવારે ૧૧ વાગ્યાની આસપાસ થયો હતો, પરંતુ આરોપી પ્રિયંકાએ છેક સાંજે ૪ વાગ્યે બૂમાબૂમ શરૂ કરી હતી. તેમણે આરોપ લગાવ્યો કે જો કંઈક અચાનક બન્યું હોત, તો તે કલાકો સુધી રાહ ન જોત. પુત્રના મૃત્યુની ખાતરી કર્યા પછી જ તેણે નાટક શરૂ કર્યું હતું કે 'શું થઈ ગયું, શું થઈ ગયું'.
પ્રેમ પ્રકરણ અને લૂંટનું ખોટું કાવતરું
પોલીસ તપાસમાં ચોંકાવનારો ખુલાસો થયો છે કે પ્રિયંકા પુરોહિતે તેના પ્રેમી કમલેશ સાથે મળીને દેવકૃષ્ણની હત્યાનું કાવતરું ઘડ્યું હતું. આ જઘન્ય અપરાધને છુપાવવા માટે તેમણે તેને લૂંટની ઘટના તરીકે રજૂ કરવાનો નિષ્ફળ પ્રયાસ કર્યો હતો. જોકે, પોલીસે કડક પૂછપરછ બાદ સત્ય શોધી કાઢ્યું અને પત્ની તથા તેના પ્રેમી બંનેની ધરપકડ કરી લીધી છે.
સમગ્ર પંથકમાં આઘાતની લાગણી
આ ઘટનાને પગલે સમગ્ર વિસ્તારના લોકો સ્તબ્ધ છે. સોશિયલ મીડિયા પર વૃદ્ધ માતાના ન્યાય માટેના પોકારને વ્યાપક સમર્થન મળી રહ્યું છે. લોકો માંગ કરી રહ્યા છે કે ન્યાયતંત્ર આ મામલે ઝડપી કાર્યવાહી કરે જેથી એક શોકગ્રસ્ત અને નિઃસહાય માતાને ન્યાય મળી શકે. પોલીસ હાલમાં આ મામલે વધુ પુરાવા એકત્ર કરી રહી છે.