ઈસ્લામાબાદ : પશ્ચિમ એશિયામાં ચાલી રહેલા ભીષણ સંઘર્ષ વચ્ચે હવે મુત્સદ્દીગીરીના દ્વાર ખુલ્યા છે. અમેરિકાના વાઇસ પ્રેસિડેન્ટ જેડી વેન્સ શુક્રવારે પાકિસ્તાનમાં યોજાનારી નિર્ણાયક યુએસ-ઈરાન શાંતિ વાટાઘાટો માટે વોશિંગ્ટનથી રવાના થયા છે. ઉડાન ભરતા પહેલા તેમણે આશાવાદ વ્યક્ત કર્યો હતો કે જો ઈરાન સદ્ભાવનાથી વાતચીત કરશે, તો અમેરિકા ચોક્કસપણે મિત્રતાનો હાથ લંબાવશે. જોકે, તેમણે ચેતવણી પણ આપી છે કે જો ઈરાન કોઈ રમત રમશે, તો અમેરિકાનું વલણ અત્યંત કડક હશે.
યુદ્ધવિરામ છતાં હુમલા જારી
શાંતિ વાટાઘાટો વચ્ચે પણ જમીની સ્થિતિ હજુ નાજુક છે. બે અઠવાડિયાના યુદ્ધવિરામની જાહેરાત છતાં કુવૈતે ગતરોજ ઈરાન પર ડ્રોન હુમલાનો આરોપ લગાવ્યો છે. સાઉદી અરેબિયાએ પણ દાવો કર્યો છે કે તાજેતરના હુમલાઓને કારણે તેમની એક મુખ્ય ઓઈલ પાઈપલાઈનને ભારે નુકસાન પહોંચ્યું છે. આ દરમિયાન લેબનોનથી છોડવામાં આવેલા રોકેટ બાદ ઈઝરાયલના અનેક શહેરોમાં સાયરન ગુંજી ઉઠ્યા હતા, જે દર્શાવે છે કે વાટાઘાટોની આડમાં હજુ પણ હિંસા ચાલુ છે.
ભારતની ઊર્જા સુરક્ષા પર નજર
પશ્ચિમ એશિયાના તણાવની અસર ભારત પર ન પડે તે માટે વડાપ્રધાન નરેન્દ્ર મોદીના નિર્દેશ પર ભારતીય મંત્રીઓ સતત ગલ્ફ દેશોના સંપર્કમાં છે. કેન્દ્રીય મંત્રી હરદીપ સિંહ પુરીએ કતારની મુલાકાત લીધી હતી, જ્યાં કતારના ઊર્જા મંત્રીએ ભારતને "વિશ્વસનીય ઊર્જા સપ્લાયર" તરીકેનો ભરોસો આપ્યો છે. વિદેશ મંત્રાલયના પ્રવક્તા રણધીર જયસ્વાલે જણાવ્યું કે, ભારત પશ્ચિમ એશિયાના ઘટનાક્રમ પર નજીકથી નજર રાખી રહ્યું છે અને લેબનોનમાં વધી રહેલી નાગરિક જાનહાનિ અંગે ચિંતિત છે.
ચીન અને રશિયાનું કનેક્શન
અમેરિકાએ સ્પષ્ટ કર્યું છે કે જો ચીન આ સંઘર્ષમાં ઈરાન સાથે એવી રીતે જોડાશે જે અમેરિકી હિતોની વિરુદ્ધ હશે, તો પરિસ્થિતિ વધુ જટિલ બનશે. બીજી તરફ, યુક્રેનના રાષ્ટ્રપતિ ઝેલેન્સકીએ પણ આ યુદ્ધમાં ઝંપલાવતા દાવો કર્યો છે કે રશિયા દ્વારા વપરાતા ઈરાની શાહેદ ડ્રોનને યુક્રેનિયન દળોએ તોડી પાડ્યા છે. પાકિસ્તાને આ વાટાઘાટોને સફળ બનાવવા માટે આવનારા તમામ પ્રતિનિધિઓ અને પત્રકારો માટે 'વિઝા-ઓન-અરાઈવલ'ની જાહેરાત કરી છે, જેનાથી ઈસ્લામાબાદ હવે વૈશ્વિક રાજનીતિનું કેન્દ્ર બની ગયું છે.
વિશ્વ આખું અત્યારે પાકિસ્તાનમાં યોજાનારી આ બેઠક પર મીટ માંડીને બેઠું છે, કારણ કે આ વાટાઘાટોનું પરિણામ જ નક્કી કરશે કે પશ્ચિમ એશિયામાં શાંતિ સ્થપાશે કે પછી યુદ્ધની જ્વાળાઓ વધુ ભભકશે.