ઈસ્લામાબાદ: પાકિસ્તાનની રાજધાનીમાં આવતીકાલે યોજાનારી નિર્ણાયક શાંતિ મંત્રણા પહેલા ઈરાને કડક વલણ અપનાવતા નવી શરતો જાહેર કરી છે. ઈરાની સંસદના સ્પીકર મોહમ્મદ બાઘર ગાલિબાફે સ્પષ્ટ કર્યું છે કે જ્યાં સુધી અમેરિકા લેબનોનમાં તાત્કાલિક યુદ્ધવિરામ લાગુ ન કરે અને વર્ષોથી રોકી રાખેલી ઈરાની સંપત્તિ મુક્ત ન કરે, ત્યાં સુધી અમેરિકી પ્રતિનિધિમંડળ સાથે કોઈ વાતચીત કરવામાં આવશે નહીં. આ જાહેરાતને કારણે પાકિસ્તાન દ્વારા મધ્યસ્થી કરવામાં આવી રહેલી આ હાઈ-પ્રોફાઈલ બેઠક પર અનિશ્ચિતતાના વાદળો છવાઈ ગયા છે.

બીજી તરફ, ઈરાની સેનાએ પણ યુદ્ધની ધમકી ઉચ્ચારી છે. ખાત્મ અલ-અંબિયા મુખ્યાલયે એક નિવેદનમાં જણાવ્યું છે કે તેમની સેના "ટ્રિગર પર આંગળી" રાખીને બેઠી છે અને જો લેબનોનમાં હિઝબુલ્લાહ પર હુમલા ચાલુ રહેશે, તો ઈરાન અત્યંત પીડાદાયક જવાબ આપશે. આ ઉપરાંત, ઈરાને હોર્મુઝ સ્ટ્રેટ પર નવી વ્યૂહરચના સાથે આગળ વધવાની ચેતવણી આપીને વૈશ્વિક તેલ પુરવઠા પર પણ દબાણ બનાવવાનો પ્રયાસ કર્યો છે.

અમેરિકાના ઉપરાષ્ટ્રપતિ જે.ડી. વાન્સ આ વાટાઘાટો માટે ઈસ્લામાબાદ પહોંચી રહ્યા છે, પરંતુ તેમણે પણ ઈરાનને કડક શબ્દોમાં ચેતવણી આપી છે. વાન્સે જણાવ્યું હતું કે જો ઈરાન પ્રામાણિકતાથી વાતચીત કરવા તૈયાર હશે તો જ અમેરિકા સહકાર આપશે, પરંતુ જો કોઈ પણ પ્રકારની ચાલાકી કરવામાં આવશે તો અમેરિકી ટીમ કડક વલણ અપનાવશે. હાલમાં ઈરાની પ્રતિનિધિમંડળ હજુ સુધી ઈસ્લામાબાદ પહોંચ્યું નથી, જેના કારણે આ મંત્રણા થશે કે કેમ તે અંગે સસ્પેન્સ યથાવત છે.