લખનૌ:  ઉત્તર પ્રદેશમાં ગેરકાયદેસર ઇમિગ્રેશન અને માનવ તસ્કરી વિરુદ્ધ યોગી સરકારની 'ઝીરો ટોલરન્સ' નીતિ હેઠળ મોટી સફળતા મળી છે. લખનૌની વિશેષ અદાલતે એક સીમાચિહ્નરૂપ ચુકાદો આપતા 5 રોહિંગ્યા અને 3 બાંગ્લાદેશી નાગરિકો સહિત કુલ 9 આરોપીઓને 8 વર્ષની સખત કેદની સજા ફટકારી છે. આ તમામ આરોપીઓ પર આર્થિક દંડ પણ લાદવામાં આવ્યો છે. આ ગેંગ નકલી દસ્તાવેજો બનાવીને વિદેશી નાગરિકોને ભારતમાં ઘુસાડવા અને સગીર બાળકીઓની તસ્કરી જેવા ગંભીર ગુનાઓમાં લિપ્ત હતી.

આ સમગ્ર કૌભાંડનો પર્દાફાશ ઉત્તર પ્રદેશ ATS દ્વારા વર્ષ 2021 માં કરવામાં આવ્યો હતો. ગાઝિયાબાદ રેલવે સ્ટેશન પર હાથ ધરાયેલા ઓપરેશન દરમિયાન મોહમ્મદ નૂર અને તેના સાથીદારોની ધરપકડ કરવામાં આવી હતી, જેમની કસ્ટડીમાંથી અનેક સગીર બાળકીઓને મુક્ત કરાવાઈ હતી. તપાસમાં બહાર આવ્યું કે આ નેટવર્ક અત્યંત વ્યવસ્થિત રીતે સરહદ પારથી માનવ તસ્કરીનું સંચાલન કરતું હતું. કોર્ટે પુરાવાઓના આધારે નોંધ્યું કે આ ગુનેગારો દેશની આંતરિક સુરક્ષા માટે મોટું જોખમ હતા.

કોર્ટના આ કડક વલણને કારણે રાજ્યમાં સંગઠિત ગુનાખોરી અને ગેરકાયદે ઘૂસણખોરી કરતા તત્વોમાં ફફડાટ ફેલાઈ ગયો છે. આ ચુકાદો સુરક્ષા એજન્સીઓ માટે મોટી જીત સમાન છે, કારણ કે તેનાથી માનવ તસ્કરીના નેટવર્કને મોટો ફટકો પડ્યો છે. યુપી એટીએસ હવે આ ગેંગના અન્ય છુપા તાર શોધવા માટે વધુ તપાસ કરી રહી છે જેથી ભવિષ્યમાં આવા રાષ્ટ્રવિરોધી કૃત્યોને અટકાવી શકાય.