બેઇજિંગ:  વૈશ્વિક રાજકારણના સ્ટેજ પર અત્યારે એક હાઈ-વોલ્ટેજ ડ્રામા ભજવાઈ રહ્યો છે. આવતા મહિને અમેરિકી પ્રમુખ ડોનાલ્ડ ટ્રમ્પ ચીનની મુલાકાતે જવાના છે, પરંતુ તેમના પગ મૂકતા પહેલા જ રશિયન પ્રમુખ વ્લાદિમીર પુતિને પોતાના સૌથી વિશ્વાસુ અને અનુભવી રાજદ્વારી સેરગેઈ લાવરોવને બેઇજિંગ મોકલીને 'પ્રી-એમ્પટિવ સ્ટ્રાઈક' કરી છે. ટ્રમ્પની સ્ટાઇલ હંમેશા 'પહેલા ધમકી અને પછી વાટાઘાટો'ની રહી છે; તેમણે ઈરાનને શસ્ત્રો આપવા બદલ ચીન પર 50 ટકા ટેરિફ લાદવાની ધમકી આપીને શી જિનપિંગને દબાણમાં લાવવાનો પ્રયાસ કર્યો છે. આ સંજોગોમાં લાવરોવની મુલાકાત એ માત્ર મુલાકાત નથી, પણ રશિયા તરફથી ચીનને આપવામાં આવેલો એ ભરોસો છે કે પશ્ચિમી દેશોના દબાણ સામે ઝૂકવા કરતાં રશિયા સાથેની મિત્રતામાં જ ચીનનું ભવિષ્ય સુરક્ષિત છે.

આ મુલાકાતનો મુખ્ય એજન્ડા મધ્ય પૂર્વમાં સળગી રહેલી ઈરાન યુદ્ધની આગ છે. રશિયા માટે ઈરાન એક અત્યંત મહત્વનો સાથી છે જે યુક્રેન યુદ્ધમાં તેને સૈન્ય મદદ કરી રહ્યો છે, જ્યારે ચીન માટે ઈરાન સસ્તા તેલનો સૌથી મોટો સપ્લાયર છે. લાવરોવ અને ચીની વિદેશ મંત્રી વાંગ યી વચ્ચેની આ બેઠકમાં ઈરાન પરના સંભવિત અમેરિકી હુમલા સામે એક સામાન્ય મોરચો તૈયાર કરવાની ચર્ચા થશે. રશિયા ચીનને સમજાવશે કે જો આજે અમેરિકા ઈરાનને તોડવામાં સફળ રહેશે, તો કાલે રશિયા અને તે પછી ઈન્ડો-પેસિફિક ક્ષેત્રમાં ચીનનો વારો આવશે. આમ, ઈરાનનું રક્ષણ કરવું એ હવે માત્ર તેહરાનની જરૂરિયાત નથી, પરંતુ મોસ્કો અને બેઇજિંગ માટે પોતાના અસ્તિત્વની લડાઈ બની ગઈ છે.

ટ્રમ્પ જ્યારે 14 મેના રોજ ચીન પહોંચશે, ત્યારે તેમનો મુખ્ય ઉદ્દેશ્ય ચીનને રશિયા અને ઈરાનથી અલગ કરવાનો હશે. ટ્રમ્પ ઈચ્છે છે કે ચીન રશિયાની એ 'લાઈફલાઈન' કાપી નાખે જેના જોરે પુતિન યુક્રેનમાં ટકી રહ્યા છે. લાવરોવ આ 'ટ્રમ્પ કાર્ડ'ને નિષ્ફળ બનાવવા માટે મેદાન તૈયાર કરી રહ્યા છે. તેઓ શી જિનપિંગની સરકારને ખાતરી આપશે કે અમેરિકા સાથેનો કોઈ પણ સોદો કામચલાઉ હોઈ શકે છે, પણ રશિયા-ચીનનું વ્યૂહાત્મક જોડાણ જ નવા વિશ્વ વ્યવસ્થા નો પાયો નાખશે. BRICS અને SCO જેવા મંચો પર પોતાની પકડ મજબૂત કરીને આ બંને દેશો પશ્ચિમી દેશોના ઘેરાબંધી સામે એક મજબૂત કિલ્લો બનાવવાની તૈયારી કરી રહ્યા છે.