અમદાવાદ:ભારતના રાષ્ટ્રપતિ દ્રૌપદી મુર્મુજી ત્રણ દિવસીય ગુજરાત પ્રવાસના હેતુથી આજે અમદાવાદ એરપોર્ટ પર આવી પહોંચ્યા હતા. તેમના આગમન સમયે એરપોર્ટ પર રાજ્યના પ્રથમ નાગરિક અને અન્ય મહાનુભાવો દ્વારા તેમનું ગરિમાપૂર્ણ અને ઉષ્માસભર સ્વાગત કરવામાં આવ્યું હતું.

મહાનુભાવો દ્વારા પુષ્પગુચ્છથી સ્વાગત:

રાષ્ટ્રપતિના અમદાવાદ એરપોર્ટ પર ઉતરાણ સમયે રાજ્યપાલ આચાર્ય દેવવ્રતજી, મુખ્યમંત્રી ભૂપેન્દ્રભાઈ પટેલ અને નાયબ મુખ્યમંત્રી હર્ષભાઈ સંઘવીએ તેમની આગેવાની કરી હતી અને પુષ્પગુચ્છ અર્પણ કરી ગુજરાતની ધરતી પર તેમને આવકાર્યા હતા. આ પ્રસંગે રાજ્ય મંત્રી મંડળના સભ્ય પ્રફુલ પાનશેરિયા પણ ઉપસ્થિત રહ્યા હતા. રાષ્ટ્રપતિના આ પ્રવાસને લઈને વહીવટી તંત્ર દ્વારા ચુસ્ત સુરક્ષા બંદોબસ્ત અને તમામ પ્રોટોકોલનું પાલન કરવામાં આવ્યું હતું.

ઉચ્ચ અધિકારીઓની ઉપસ્થિતિ:

સ્વાગત કાર્યક્રમમાં રાજ્યના વહીવટી અને પોલીસ તંત્રના ઉચ્ચ અધિકારીઓ પણ જોડાયા હતા. જેમાં મુખ્ય સચિવ એમ. કે. દાસ, રાજ્યના ઇન્ચાર્જ પોલીસ વડા કે.એલ.એન રાવ, અમદાવાદ શહેર પોલીસ કમિશનર જી.એસ. મલિક અને અમદાવાદ કલેકટર સુજીત કુમારે રાષ્ટ્રપતિનું અભિવાદન કર્યું હતું. આ ઉપરાંત લશ્કરી પ્રોટોકોલ મુજબ એર માર્શલ મહેતાબસિંહ દેશવાલ અને જીઓસી ગૌરવ બગ્ગાએ પણ રાષ્ટ્રપતિને આવકાર્યા હતા.

રાષ્ટ્રપતિ તેમના આ ત્રણ દિવસીય પ્રવાસ દરમિયાન રાજ્યના વિવિધ કાર્યક્રમોમાં હાજરી આપશે, જેને લઈને તંત્ર દ્વારા તમામ તૈયારીઓ પૂર્ણ કરી દેવામાં આવી છે. એરપોર્ટ પર ટૂંકા રોકાણ બાદ રાષ્ટ્રપતિ નિર્ધારિત કાર્યક્રમો માટે રવાના થયા હતા.