મુંબઈ : બોલિવૂડ અભિનેત્રી સેલિના જેટલી અને તેમના અલગ થયેલા પતિ પીટર હાગ વચ્ચેનો વિવાદ હવે કાનૂની લડાઈના નવા તબક્કામાં પ્રવેશ્યો છે. હાલમાં જ પીટર હાગ અને તેમના પિતા વુલ્ફગેંગ જે. હાગે સેલિનાને માનહાનિની કાનૂની નોટિસ મોકલી છે, જેના જવાબમાં સેલિનાએ અત્યંત આક્રમક વલણ અપનાવ્યું છે. સોશિયલ મીડિયા પર એક નિવેદન જારી કરીને સેલિનાએ સ્પષ્ટ કર્યું છે કે તે કોઈ પણ કિંમતે પોતાના અને પોતાના બાળકોના અધિકારો માટે લડવાનું છોડશે નહીં.

શું છે આ માનહાનિનો મામલો?

હાગ પરિવારના પ્રતિનિધિ તરીકે મુંબઈની લો-ફર્મ 'સેમવાલ એન્ડ કંપની' દ્વારા મોકલવામાં આવેલી નોટિસમાં દાવો કરવામાં આવ્યો છે કે સેલિના ભારત અને વિદેશમાં ડિજિટલ પ્લેટફોર્મ પર પરિવાર વિરુદ્ધ ખોટા અને બદનક્ષીકારક નિવેદનોનું "અભિયાન" ચલાવી રહી છે. પરિવારનું કહેવું છે કે આ પ્રકારના જાહેર નિવેદનોથી તેમની પ્રતિષ્ઠાને ગંભીર નુકસાન પહોંચ્યું છે, ખાસ કરીને જ્યારે કસ્ટડીનો કેસ ઓસ્ટ્રિયાની કોર્ટમાં પેન્ડિંગ છે.

સેલિનાનો વળતો પ્રહાર: 'દંભી લોકોનું જૂથ'

આ નોટિસનો જવાબ આપતા સેલિનાએ પરિવારની ગોપનીયતાની દલીલ પર સવાલ ઉઠાવ્યા છે. તેમણે આક્ષેપ કર્યો કે જ્યારે ફાયદો લેવાનો હોય ત્યારે આ પરિવારે હંમેશા મીડિયાનો સહારો લીધો છે, પરંતુ હવે જ્યારે સત્ય સામે આવી રહ્યું છે ત્યારે તેઓ 'પ્રાઈવસી'ના ઓઠા હેઠળ તેને દબાવવા માંગે છે. સેલિનાએ પોતાની પોસ્ટમાં લખ્યું, "50 વર્ષીય પુરુષ અને તેના 75 વર્ષીય પિતા એક મહિલા વિરુદ્ધ કાનૂની દાવપેચ રમી રહ્યા છે, જેણે વર્ષોના દુર્વ્યવહાર બાદ હવે અવાજ ઉઠાવવાની હિંમત કરી છે. આ જ તેમની માનસિકતા દર્શાવે છે."

ભારતમાં ગુનાહિત કાર્યવાહી અને LOC

આ વિવાદ માત્ર કાનૂની નોટિસ સુધી મર્યાદિત નથી. સેલિનાએ મે 2026માં મુંબઈના વર્સોવા પોલીસ સ્ટેશનમાં પીટર હાગ વિરુદ્ધ ભારતીય ન્યાય સંહિતા (BNS) હેઠળ FIR નોંધાવી છે. જેમાં ક્રૂરતા, શારીરિક હિંસા અને ગુનાહિત ધાકધમકી જેવા ગંભીર આરોપો છે. એટલું જ નહીં, તપાસમાં સહકાર ન આપવાને કારણે ભારતીય સત્તાવાળાઓએ પીટર હાગ વિરુદ્ધ 'લુકઆઉટ સર્ક્યુલર' (LOC) પણ જારી કર્યો છે. સેલિનાનું કહેવું છે કે પોલીસ ફરિયાદ, હિંસાના આરોપો અને કોર્ટમાં પેન્ડિંગ પુરાવાઓથી ધ્યાન ભટકાવવા માટે જ આ માનહાનિની નોટિસનું નાટક રચવામાં આવ્યું છે.

આ હાઇ-પ્રોફાઇલ કેસ હવે બંને દેશોના કાયદાકીય માળખા વચ્ચે કેવો વળાંક લે છે, તે જોવું ખૂબ જ મહત્વનું બની રહેશે.