પીએમ મોદીના ૯૯ વિદેશ પ્રવાસ અને ૧૯ સંસદોને સંબોધન
વૈશ્વિક સફરની અનોખી કહાની... ૨૦૧૪ થી ૨૦૨૬ દરમિયાન ૧૯ વિદેશી સંસદોને સંબોધિત કરવાનો રેકોર્ડ
નવી દિલ્હી,તા.૬: પીએમ મોદીએ ૨૦૧૪ થી ૨૦૨૬ દરમિયાન વિશ્વના વિવિધ દેશોની ૧૯ સંસદોને સંબોધિત કર્યા છે. આ કોઈપણ ભારતીય વડાપ્રધાન દ્વારા બનાવેલ સૌથી વધુ રેકોર્ડ છે. ભાજપે શુક્રવારે કહ્યું કે, પીએમ મોદીએ કોઈપણ અગાઉના ભારતીય વડાપ્રધાન કરતાં વધુ વિદેશી સંસદોને સંબોધિત કર્યા છે. પાર્ટીએ આને ભારતની વધતી જતી વૈશ્વિક શક્તિ, રાજદ્વારી પ્રભાવ અને આંતરરાષ્ટ્રીય પ્રતિષ્ઠાનો પુરાવો ગણાવ્યો.
ભાજપે સોશિયલ મીડિયા પ્લેટફોર્મ X પર કહ્યું કે પીએમ મોદીએ યુએસ કોંગ્રેસથી લઈને ઇઝરાયલી સંસદ નેસેટ સુધી સંબોધન કર્યું છે. પાર્ટીના મતે, આ સિદ્ધિ દર્શાવે છે કે ભારતનો અવાજ વૈશ્વિક સ્તરે વધુ મજબૂત બન્યો છે. આંકડા મુજબ, ભારતના પ્રથમ વડાપ્રધાન જવાહરલાલ નહેરુએ તેમના કાર્યકાળ દરમિયાન ત્રણ વિદેશી સંસદોને સંબોધિત કર્યા હતા. ઇન્દિરા ગાંધીએ ચાર, મનમોહન સિહે સાત, જ્યારે રાજીવ ગાંધી અને અટલ બિહારી વાજપેયીએ બે-બે સંબોધન કર્યા હતા. ૨૦૧૪ માં ચાર દેશોની સંસદોને સંબોધન વડાપ્રધાન બન્યાના થોડા સમય પછી, નરેન્દ્રભાઈ મોદીએ ૨૦૧૪ માં ઓસ્ટ્રેલિયા, ફીજી, નેપાળ અને ભૂટાનની સંસદોને સંબોધિત કર્યા.
ત્યારબાદ, ૨૦૧૫ માં, તેમણે મોરેશિયસની રાષ્ટ્રીય સભા, શ્રીલંકાની સંસદ, મોંગોલિયાની સંસદ અને યુનાઇટેડ કિગડમની સંસદને સંબોધિત કર્યા. ડિસેમ્બર ૨૦૧૫માં, પીએમ મોદીએ અફઘાનિસ્તાનની સંસદને સંબોધિત કરી. જૂન ૨૦૧૬ માં, તેમણે પહેલી વાર યુએસ કોંગ્રેસના સંયુક્ત સત્રને સંબોધિત કર્યું, જે તેમના સૌથી પ્રખ્યાત વિદેશી ભાષણોમાંનું એક માનવામાં આવે છે. ત્યારબાદ તેમણે ૨૦૧૮ માં યુગાન્ડાની સંસદને અને ૨૦૧૯ માં માલદીવની સંસદને સંબોધિત કરી.
૨૦૨૩ માં, મોદીએ બીજી વાર યુએસ કોંગ્રેસના સંયુક્ત સત્રને સંબોધિત કર્યું. ત્યાં, તેમણે કહ્યું કે ભારત લોકશાહીની માતા છે અને લોકશાહી ચર્ચા, સંવાદ અને અભિવ્યક્તિની સ્વતંત્રતાને પ્રોત્સાહન આપે છે. ભાજપના મતે, ૨૦૨૪ માં, મોદીએ ગુયાનાની સંસદને સંબોધિત કરી. જુલાઈ ૨૦૨૫ માં, તેમણે ઘાના, ત્રિનિદાદ અને ટોબેગો અને નામિબિયાની સંસદને સંબોધિત કરી. ત્યારબાદ તેમણે ઇથોપિયાની સંસદને સંબોધિત કરી.તાજેતરમાં વડાપ્રધાન મોદીએ ઇઝરાયલી સંસદ નેસેટને સંબોધિત કર્યું. ભાષણ દરમિયાન, તેમણે ૭ ઓક્ટોબર, ૨૦૨૩ ના રોજ હમાસના હુમલાનો ઉલ્લેખ કર્યો અને માર્યા ગયેલા ઇઝરાયલી નાગરિકો પ્રત્યે સંવેદના વ્યક્ત કરી. તેમને ઇઝરાયલી સંસદના સર્વોચ્ચ સન્માનથી પણ નવાજવામાં આવ્યા હતા. ફેબ્રુઆરી ૨૦૨૬ સુધીમાં, વડાપ્રધાન મોદીએ ૭૯ દેશોની ૯૯ વિદેશ મુલાકાતો કરી છે. વિદેશી સંસદોમાં તેમના ભાષણો ભારતની વધતી જતી વૈશ્વિક ભૂમિકા અને આંતરરાષ્ટ્રીય પ્રભાવને દર્શાવે છે.
(10:19 AM IST)
છેલ્લા 8 દિવસમાં સૌથી લોકપ્રિય 
