અમદાવાદ: અદાણી ગ્રુપના ચેરમેન ગૌતમ અદાણીએ શેરબજારમાં જોરદાર કમબેક કરીને ફરી એકવાર એશિયાના સૌથી ધનિક વ્યક્તિનું બિરુદ પોતાના નામે કરી લીધું છે. શુક્રવારે અદાણી ગ્રુપની કંપનીઓના શેરમાં નોંધપાત્ર તેજી જોવા મળી હતી, જેના કારણે તેમની કુલ સંપત્તિ વધીને $89.2 બિલિયન થઈ ગઈ છે. આ આંકડા સાથે તેમણે રિલાયન્સ ઇન્ડસ્ટ્રીઝના ચેરમેન મુકેશ અંબાણી ($88 બિલિયન) અને સોફ્ટબેંકના સીઈઓ માસાયોશી સન ($87 બિલિયન) બંને દિગ્ગજોને એકસાથે પાછળ છોડી દીધા છે. રસપ્રદ વાત એ છે કે, જાપાની રોકાણ કંપની સોફ્ટબેંકના શેરમાં ગુરુવારે થયેલા ભારે ઘટાડા પહેલા માસાયોશી સન માત્ર એક દિવસ માટે જ આ તાજ પહેરી શક્યા હતા.

આ ઐતિહાસિક તેજી પાછળ અદાણી ગ્રુપના ગ્રીન અને એનર્જી સેક્ટરના શેરોનો સિંહફાળો રહ્યો છે. શુક્રવારના ટ્રેડિંગ સેશનમાં અદાણી ગ્રીન એનર્જીના શેર 7% અને અદાણી એનર્જીના શેર 4% સુધી ઉછળ્યા હતા, જ્યારે અદાણી એન્ટરપ્રાઇઝ અને અદાણી પોર્ટ્સમાં પણ 2% નો વધારો નોંધાયો હતો. વર્ષ 2026માં અત્યાર સુધીમાં આ શેરોમાં 23% થી લઈને 56% સુધીનો બમ્પર વધારો જોવા મળ્યો છે. આ તેજીના કારણે ગૌતમ અદાણી ફોર્બ્સની યાદીમાં $2.5 બિલિયનની વન-ડે કમાણી સાથે વિશ્વમાં બીજા ક્રમે સૌથી વધુ કમાણી કરનાર વ્યક્તિ બન્યા હતા, જ્યારે પ્રથમ સ્થાને અબજોપતિ વોરેન બફેટ રહ્યા હતા જેમણે એક જ દિવસમાં $3 બિલિયન જોડ્યા હતા.

ગૌતમ અદાણીની સંપત્તિમાં આવેલી આ સુનામી પાછળ માત્ર બજારનું સેન્ટિમેન્ટ જ નહીં, પરંતુ કાનૂની મોરચે મળેલી મોટી રાહત પણ જવાબદાર છે. યુએસ જસ્ટિસ ડિપાર્ટમેન્ટ દ્વારા સોલાર એનર્જી પ્રોજેક્ટ માટે લાંચ આપવાના તમામ આરોપો સત્તાવાર રીતે પાછા ખેંચાતા જ રોકાણકારોનો ભરોસો અદાણી ગ્રુપ પર મજબૂત થયો હતો અને તેમની સંપત્તિમાં સીધો $10 બિલિયનનો જંગી વધારો થયો. હાલમાં ફોર્બ્સની રિયલ-ટાઇમ અબજોપતિઓની યાદી અનુસાર ગૌતમ અદાણી વિશ્વના 23મા સૌથી ધનિક વ્યક્તિ બની ગયા છે અને તેમની બજાર ક્ષમતા સતત નવા રેકોર્ડ સર્જી રહી છે.