હૈદરાબાદ: આંધ્રપ્રદેશના નાયબ મુખ્યમંત્રી અને જાણીતા ફિલ્મ સ્ટાર પવન કલ્યાણે તેલંગાણાના રાજકારણમાં ફરી એકવાર ધમાકેદાર એન્ટ્રી કરવાના સંકેત આપતા રાજકીય ગરમાવો વધી ગયો છે. તેલંગાણા સ્થાપના દિવસના અવસરે પોતાની પાર્ટી 'જનસેના' (JSP) ના વિસ્તરણની જાહેરાત કરતા પવન કલ્યાણે વિરોધીઓને આડે હાથ લીધા હતા. તેમણે સ્પષ્ટ શબ્દોમાં કહ્યું કે, "તેલંગાણા કોઈના પિતાની ખાનગી જાગીર નથી," અને આ રાજ્ય ભારતનો એક અભિન્ન હિસ્સો છે.
પરવાનગી નકારાતા રોષ
વાત ત્યારે વણસી જ્યારે સાયબરાબાદ પોલીસે પવન કલ્યાણની 'તેલંગાણા નવ નિર્માણ સંકલ્પ સભા' માટે પરવાનગી આપવાનો ઇનકાર કરી દીધો. પોલીસે કાયદો અને વ્યવસ્થાની સ્થિતિનું કારણ આગળ ધર્યું હતું. પવન કલ્યાણે આ નિર્ણય સામે ભારે દુઃખ વ્યક્ત કરતા સવાલ કર્યો હતો કે, શું એક ભારતીય નાગરિકને દેશના એક રાજ્યથી બીજા રાજ્યમાં જવા માટે પાસપોર્ટની જરૂર છે? તેમણે રાહુલ ગાંધી, પ્રિયંકા ગાંધી અને અન્ય નેતાઓના ઉદાહરણો આપીને દલીલ કરી હતી કે જ્યારે અન્ય નેતાઓ મુક્તપણે રાજ્યોમાં ફરી શકે છે, તો તેમના માટે આ દંભી દલીલો કેમ?
કોંગ્રેસ અને BRS સાથે સામસામે
પવન કલ્યાણના આ નિવેદન બાદ તેલંગાણાના રાજકારણમાં જૂથવાદ તેજ બન્યો છે. કોંગ્રેસના મંત્રી પોન્નમ પ્રભાકરે વળતો પ્રહાર કરતા કહ્યું હતું કે, "તેલંગાણા અહીંની 4 કરોડ જનતાની જાગીર છે, તમારા પિતાની નહીં." તો બીજી તરફ BRS ના નેતા કે.ટી. રામા રાવે પણ પ્રાદેશિક ભાવનાઓ પર ચોટ કરતા સવાલો ઉઠાવ્યા હતા. તેમણે પૂછ્યું કે, જ્યારે અન્ય રાજ્યોમાં પ્રાદેશિક આંદોલનોને ગૌરવ માનવામાં આવે છે, તો તેલંગાણાના આંદોલનને નકારાત્મક રીતે કેમ દર્શાવવામાં આવી રહ્યું છે?
શું છે પવન કલ્યાણનો પ્લાન?
જનસેના પાર્ટી આગામી હૈદરાબાદ મ્યુનિસિપલ કોર્પોરેશનની ચૂંટણી અને વિધાનસભા ચૂંટણીઓમાં 'ગઠબંધન સાથે કે વગર' લડવા માટે મક્કમ છે. પવન કલ્યાણનું માનવું છે કે, આંધ્રપ્રદેશના વસાહતીઓ અને ખાસ કરીને IT ક્ષેત્રમાં કામ કરતા લોકોની મોટી વસ્તી ધરાવતા વિસ્તારોમાં તેમની પાર્ટીનો મજબૂત પ્રભાવ છે. ભલે તેમની પાર્ટીનો આંધ્રપ્રદેશ બહાર પ્રભાવ મર્યાદિત હોય, પરંતુ તેમની સક્રિયતાએ કોંગ્રેસ અને BRS ની રણનીતિને જરૂરથી હચમચાવી દીધી છે.
રાજકીય ગણિત અને ગરમાવો
આ સમગ્ર વિવાદમાં આંધ્રપ્રદેશના મુખ્યમંત્રી ચંદ્રબાબુ નાયડુ પણ પોતાના સહયોગી પવન કલ્યાણના સમર્થનમાં આગળ આવ્યા છે. તેમણે બે રાજ્યો વચ્ચે રચનાત્મક સંસ્કૃતિ અને સ્વસ્થ સ્પર્ધાની સલાહ આપી છે, જ્યારે બીજી તરફ ભાજપના નેતાઓએ કોંગ્રેસ સરકાર પર પ્રહાર કરતા તેને 'કટોકટી જેવી માનસિકતા' ગણાવી છે. પવન કલ્યાણના આ પગલાંએ સ્પષ્ટ કરી દીધું છે કે, આવનારા સમયમાં બે તેલુગુ રાજ્યો વચ્ચે પ્રાદેશિક અસ્મિતા અને રાજકીય વર્ચસ્વની જંગ વધુ તીવ્ર બનશે.