નવી દિલ્હી: દેશમાં લાંબા સમયથી ચાલી રહેલી 'ફ્રીબીઝ' એટલે કે મફત કલ્યાણકારી યોજનાઓની ચર્ચા વચ્ચે વડાપ્રધાનના આર્થિક સલાહકાર પરિષદના સભ્ય ડૉ. શમિકા રવિએ એક મહત્વપૂર્ણ નિવેદન આપ્યું છે. તેમણે આ યોજનાઓનો બચાવ કરતા આશા વ્યક્ત કરી છે કે આ પ્રકારની સહાય અને મફત સુવિધાઓ વાસ્તવમાં ભારતની ઉત્પાદકતા (પ્રોડક્ટિવિટી) વધારવામાં મદદરૂપ સાબિત થઈ રહી છે. સામાન્ય રીતે આર્થિક જગતમાં ફ્રીબીઝની ટીકા થતી હોય છે, પરંતુ પીએમ ઈકોનોમિક એડવાઈઝરના આ હકારાત્મક વલણથી હવે આર્થિક નીતિઓ ઘડવામાં ગરીબો અને મધ્યમ વર્ગને અપાતી રાહતોનું મહત્વ પૂરવાર થઈ રહ્યું છે.