નવી દિલ્‍હી,તા.૮: ભારતીય સેના પોતાની ફાયર સપોર્ટ ક્ષમતાને વધુ આધુનિક બનાવવા માટે એક મોટું કદમ ઉઠાવી રહી છે. સેનાએ દેશની સંરક્ષણ કંપનીઓ પાસે નવા 'મોર્ટાર સ્‍પેશિયાલિસ્‍ટ વ્‍હીકલ' માટે માહિતી માંગી છે. પૈડાં પર આધારિત આ વાહન મોર્ટાર સિસ્‍ટમને વધુ સચોટ, ઝડપી અને અસરકારક બનાવવામાં મદદરૂપ થશે. આનો મુખ્‍ય ઉદ્દેશ્‍ય યુદ્ધના મેદાનમાં સૈનિકોની ગતિશીલતા વધારવાની સાથે નિશાનની ચોકસાઈમાં સુધારો કરવાનો છે.

મોર્ટાર એ સેનાના સૌથી મહત્‍વપૂર્ણ પરોક્ષ હથિયારોમાંનું એક છે, જેનો ઉપયોગ દુશ્‍મનના સ્‍થળો પર દૂરથી ગોળીબાર કરવા માટે થાય છે. હાલમાં મોટાભાગની મોર્ટાર સિસ્‍ટમ મેન્‍યુઅલ રીતે સંચાલિત થાય છે, જેમાં ફાયરિગ માટે જરૂરી ગણતરીઓ સૈનિકોએ જાતે જ કરવી પડે છે. આ પ્રક્રિયામાં વધુ સમય લાગે છે અને ભૂલ થવાની સંભાવના પણ રહેલી છે, જેને સેના આ નવી ટેકનોલોજીથી સજ્જ વાહન દ્વારા દૂર કરવા માંગે છે.

સૂચિત નવા વાહનમાં એક આધુનિક બેલિસ્‍ટિક કમ્‍પ્‍યુટર લગાવવામાં આવશે, જે ગણતરીનું સંપૂર્ણ કામ કરશે. અગ્રિમ મોરચે તૈનાત નિરીક્ષકો અને ફાયર કંટ્રોલર લક્ષ્યની માહિતી વાહન સુધી પહોંચાડશે, ત્‍યારબાદ કમ્‍પ્‍યુટર આપમેળે ફાયરિગ માટે જરૂરી ખૂણા અને દિશાની ગણતરી કરશે. આનાથી પહેલા જ ગોળામાં સચોટ નિશાન લાગવાની સંભાવના વધી જશે, ગોળા-બારૂદની બચત થશે અને પ્રતિક્રિયા સમય ઘટવાની સાથે માનવીય ભૂલો પણ ઓછી થશે.

આ નવા વાહનની સૌથી મોટી વિશેષતા તેની શૂટ એન્‍ડ સ્‍કૂટ ક્ષમતા હશે. આનો અર્થ એ છે કે વાહન ગોળીબાર કર્યા પછી તરત જ પોતાની જગ્‍યા બદલી શકશે, જેનાથી દુશ્‍મનની જવાબી કાર્યવાહીથી બચવામાં મોટી મદદ મળશે. આ આધુનિક વાહનનું સંચાલન માત્ર બે સૈનિકો દ્વારા સરળતાથી કરી શકાશે અને તે પોતાની સાથે લગભગ ૫૪ મોર્ટાર ગોળા લઈ જવાની ક્ષમતા ધરાવતું હશે