નવી દિલ્‍હી, તા.૮: પશ્ચિમ  એશિયામાં ભભૂકેલી જંગની જ્‍વાળાઓએ સોમવારે ભારતીય શેરબજારને ધ્રુજાવી દીધું છે, જેના કારણે દલાલ સ્‍ટ્રીટ પર બ્‍લેક મન્‍ડે જેવો માહોલ સર્જાયો હતો. ઈરાન દ્વારા ઈઝરાયલ પર કરવામાં આવેલા ભીષણ મિસાઈલ હુમલા બાદ વૈશ્વિક અર્થતંત્ર પર સંકટના વાદળો ઘેરાયા છે. બજાર ખુલતાની સાથે જ સેન્‍સેક્‍સ અને નિફ્‌ટી પત્તાના મહેલની જેમ તૂટી પડ્‍યા હતા. શરૂઆતના મિનિટોમાં જ મુંબઈ શેરબજારનો સેન્‍સેક્‍સ ૮૦૦ પોઈન્‍ટથી વધુ ગબડીને ૭૩,૪૫૮ ની સપાટીએ પહોંચી ગયો હતો, જ્‍યારે નિફ્‌ટી પણ ૨૫૦ પોઈન્‍ટનો આંચકો ખાઈને ૨૩,૧૩૧ પર આવી ગયો હતો. આ ભયાનક કડાકાને કારણે રોકાણકારોની જંગી સંપત્તિ ધોવાઈ ગઈ હતી અને માત્ર ગણતરીની મિનિટોમાં જ રૂ.૫ લાખ કરોડનો ધુમાડો થઈ ગયો હતો.

યુદ્ધના આ વૈશ્વિક આંચકાથી સેન્‍સેક્‍સની ટોચની ૩૦ કંપનીઓમાંથી ૨૮ કંપનીઓના શેર લાલ નિશાન સાથે ખૂલ્‍યા હતા. એવિએશન સેક્‍ટરની અગ્રણી કંપની ઇન્‍ડિગોના શેરમાં સૌથી વધુ ૧.૯૮% નો ઘટાડો નોંધાયો હતો, જ્‍યારે બજાજ ફાઇનાન્‍સ, ટાટા સ્‍ટીલ, એશિયન પેઇન્‍ટ્‍સ અને ટીસીએસ જેવી બ્‍લુચિપ કંપનીઓમાં પણ ભારે વેચવાલીનું દબાણ જોવા મળ્‍યું હતું. માત્ર સ્‍મોલકેપ કે મિડકેપ જ નહીં, પરંતુ સમગ્ર બજારમાં મંદીવાળાઓ હાવી થઈ ગયા હતા. જો કે, આ કટોકટી વચ્‍ચે પણ ફાર્મા અને હેલ્‍થકેર સેક્‍ટર ડિફેન્‍સિવ સાબિત થયા હતા, જેમાં ટેક મહિન્‍દ્રા અને સન ફાર્મા જેવા જૂજ શેરો લીલા નિશાન સાથે ટ્રેડ થઈને બજારને ટેકો આપવાનો પ્રયાસ કરી રહ્યા હતા.

આ વૈશ્વિક મહામંદીની અસર માત્ર ભારત પૂરતી સીમિત નહોતી, પરંતુ સમગ્ર એશિયન બજારો આ યુદ્ધની આગમાં હોમાયા હતા. દક્ષિણ કોરિયાના શેરબજારમાં તો ૯ ટકાથી વધુનો ઐતિહાસિક કડાકો બોલી જતાં ત્‍યાં ૨૦ મિનિટ માટે ટ્રેડિંગ રોકવું પડ્‍યું હતું, જ્‍યારે જાપાનનો નિક્કી પણ ૫ ટકા જેટલો ક્રેશ થયો હતો. આ આંતરરાષ્‍ટ્રીય દબાણ પાછળ ક્રૂડ ઓઇલનો ભડકો મુખ્‍ય કારણ છે, જ્‍યાં બ્રેન્‍ટ ક્રૂડ ૩.૩૭% વધીને $૯૬.૨૩ પ્રતિ બેરલ પર પહોંચી ગયું છે અને ભારતીય ઓઇલ બાસ્‍કેટનો ભાવ $૧૦૦ ની સપાટી વટાવી ગયો છે. કાચા તેલના આ આક્રમક ભાવ વધારાને કારણે દેશમાં મોંઘવારી વધવાનો ડર રોકાણકારોને સતાવી રહ્યો છે, જેને પગલે બજારમાં ગભરાટભરી વેચવાલી ચાલુ છે. (