મુંબઈ, તા. 08: મુંબઈના ડ્રગ માફિયા અને વર્ષો સુધી કાયદાથી દૂર રહેલા સલીમ ડોલાએ અંતે મૌન તોડ્યું છે. કુખ્યાત ડ્રગ લોર્ડે પૂછપરછ દરમિયાન અંડરવર્લ્ડના ડોન દાઉદ ઇબ્રાહિમ, છોટા શકીલ અને ડી-કંપની સાથેના કોઈપણ જોડાણને સદંતર નકારી કાઢ્યા છે. તુર્કીથી ભારત દેશનિકાલ કરાયા બાદ વડોદરા પોલીસની કસ્ટડીમાં રહેલા 59 વર્ષીય સલીમ ડોલાએ દાવો કર્યો છે કે તે કોઈ ગેંગનો ભાગ નથી, પરંતુ સંપૂર્ણપણે સ્વતંત્ર રીતે પોતાનું 'નેટવર્ક' ચલાવતો હતો. જોકે, ક્રાઈમ બ્રાન્ચના અધિકારીઓ તેના આ દાવાને પચાવી શકતા નથી અને ગહન તપાસ ચાલુ રાખી છે.
ગુટખાથી શરૂ થયેલો ગુનાહિત પ્રવાસ
કોટન ગ્રીનનો રહેવાસી સલીમ ડોલા શરૂઆતના સમયમાં ગુટખાની દાણચોરીમાં સક્રિય હતો, ત્યારબાદ તે ગાંજાની હેરાફેરી અને આખરે સિન્થેટિક ડ્રગ્સ જેવા ગંભીર અને જોખમી વ્યવસાયમાં જોડાયો હતો. 2018માં જામીન પર છૂટ્યા બાદ ભારતમાંથી ફરાર થયેલો ડોલા દુબઈ અને ત્યારબાદ તુર્કીમાં બેસીને ડ્રગ્સનું સામ્રાજ્ય સંભાળતો હતો. તે હર્બલ પ્રોડક્ટના નામે ફેન્ટાનાઇલ જેવા ઘાતક કેમિકલ્સની નિકાસના પ્રયાસમાં પણ કેન્દ્રીય એજન્સીઓની રડાર પર આવી ચૂક્યો છે.
તપાસકર્તાઓની શંકા કેમ અકબંધ છે?
ક્રાઈમ બ્રાન્ચના અધિકારીઓનું માનવું છે કે ડોલાના નિવેદનોમાં રહેલી વિસંગતતાઓ સ્પષ્ટ છે. સાંગલીમાં 253 કરોડ રૂપિયાનું એમડી ડ્રગ્સ ઝડપાયા બાદ જે રીતે ડોલાના સિન્ડિકેટના માણસો સામે આવ્યા છે, તે તેના દાવાઓને ખોટા સાબિત કરવા માટે પૂરતા છે. આ ઉપરાંત, જૂન 2025માં ઉત્તર પ્રદેશના એક ડ્રગ સપ્લાયરના અપહરણ કેસમાં પણ તેના તાર છોટા શકીલના નેટવર્ક સાથે જોડાયેલા હોવાની આશંકા છે. ઇન્ટરપોલની રેડ કોર્નર નોટિસ બાદ તેના પુત્ર તાહિર અને ભત્રીજા મુસ્તફાની ધરપકડથી પણ ડોલાના નેટવર્કની કમર તૂટી ગઈ છે.
તપાસની દિશા હવે બદલાશે
હાલમાં મહારાષ્ટ્ર સહિત દેશભરની અનેક એજન્સીઓ આ કેસની તપાસ કરી રહી છે. સલીમ ડોલા ભલે અત્યારે અંડરવર્લ્ડ સાથે કોઈ સંબંધ ન હોવાનો રાગ આલાપી રહ્યો હોય, પરંતુ તપાસકર્તાઓ હવે તે તમામ પુરાવાઓ ભેગા કરી રહ્યા છે જે તેને દાઉદ ઇબ્રાહિમની ગેંગ સાથે જોડે છે. જો ડોલાના આ દાવાઓ ખોટા સાબિત થશે, તો તેની મુશ્કેલીઓમાં અનેકગણો વધારો થવાની સંભાવના છે. મુંબઈના આ સૌથી મોટા ડ્રગ સિન્ડિકેટના મૂળ સુધી પહોંચવા માટે પોલીસ હવે ટેકનિકલ પુરાવાઓ અને તેના અન્ય સહયોગીઓની પૂછપરછ પર વધુ ભાર મૂકી રહી છે.