નવી દિલ્હી, તા. 08: પશ્ચિમ એશિયામાં વણસી રહેલી પરિસ્થિતિને ધ્યાનમાં લેતા, ભારતે પોતાની ઉર્જા સુરક્ષાને મજબૂત બનાવવા માટે કવાયત તેજ કરી દીધી છે. પેટ્રોલિયમ અને કુદરતી ગેસ મંત્રાલયે આજે સ્પષ્ટતા કરી છે કે યુદ્ધ જેવી સ્થિતિ વચ્ચે પણ દેશમાં ક્રૂડ ઓઈલ, LPG અને કુદરતી ગેસનો પુરવઠો સંપૂર્ણપણે સ્થિર અને નિયંત્રિત છે. મંત્રાલયના અધિક સચિવ પ્રવીણ ખાનુજાએ જણાવ્યું હતું કે, દેશભરમાં ઈંધણનો પૂરતો સ્ટોક ઉપલબ્ધ છે અને નાગરિકોએ ચિંતા કરવાની કોઈ જરૂર નથી. સરકારના અવિરત પ્રયાસોના પરિણામે સ્થાનિક રિફાઇનરીઓ અને ગેસ પ્રોસેસિંગ સુવિધાઓમાં ઉત્પાદન કટોકટી પહેલાના સ્તર કરતા લગભગ 60 ટકા વધીને 53 હજાર મેટ્રિક ટન સુધી પહોંચ્યું છે.

ખેડૂતો માટે પણ ચિંતામુક્ત સમાચાર

ઈંધણની સાથે સાથે ખેતી માટે જરૂરી ખાતરના પુરવઠા અંગે પણ મંત્રાલયે સંતોષ વ્યક્ત કર્યો છે. રસાયણ અને ખાતર મંત્રાલયના અધિક સચિવ અપર્ણા શર્માએ જણાવ્યું હતું કે, આગામી ખરીફ સિઝન માટે ખાતરની ઉપલબ્ધતા અત્યંત આરામદાયક છે. કૃષિ વિભાગ દ્વારા કરવામાં આવેલા પુનઃમૂલ્યાંકન મુજબ, જરૂરી ખાતરનો સ્ટોક જરૂરિયાત કરતા 23% થી વધુ છે. આથી, ખેડૂતોને ખાતરની અછતનો કોઈ સામનો કરવો પડશે નહીં.

ભારતીય ખલાસીઓ સુરક્ષિત: ઓપરેશન જારી

આજે બપોરે એમટી મેરી વેક્સ (MT Mary Vax) જહાજમાં આગ લાગવાની ઘટનાએ ચિંતા જગાડી હતી, જેમાં 24 ભારતીય ખલાસીઓ સવાર હતા. બંદરો, શિપિંગ અને જળમાર્ગ મંત્રાલયના નિર્દેશક ઓપેશ કુમાર શર્માએ મોટી રાહત આપતા જણાવ્યું હતું કે જહાજ પર સવાર તમામ 24 ભારતીય ક્રૂ સભ્યો સુરક્ષિત છે. ભારત સરકાર આ અંગે વિદેશ મંત્રાલય અને ભારતીય નૌકાદળ સાથે મળીને સતત સંકલન કરી રહી છે. તેમણે ઉમેર્યું કે, શિપિંગ મહાનિર્દેશાલયના સતત પ્રયાસોથી અત્યાર સુધીમાં 3,500 થી વધુ ભારતીય નાવિકોને સુરક્ષિત રીતે સ્વદેશ પરત લાવવામાં સફળતા મળી છે.

સામાન્ય સ્થિતિમાં બંદર કામગીરી

સરકારે વધુમાં સ્પષ્ટ કર્યું છે કે દેશના તમામ બંદરો પર કામગીરી સામાન્ય રીતે ચાલી રહી છે અને ત્યાં કોઈ પણ પ્રકારની ભીડ કે અગવડતા જોવા મળી નથી. સંઘર્ષની સ્થિતિમાં ઉર્જા અને પુરવઠા સાંકળને જાળવી રાખવા માટે સરકાર સતત એલર્ટ મોડ પર છે. આ નિવેદનો દ્વારા સરકારે દેશની આંતરિક આર્થિક સ્થિતિ મજબૂત હોવાનો અને કટોકટીના સમયે પણ ભારત તૈયાર હોવાનો સ્પષ્ટ સંદેશ આપ્યો છે.