મોહનપુર (ત્રિપુરા) : ત્રિપુરામાં ડ્રગ્સના કાળા કારોબાર વિરુદ્ધ એક્સાઇઝ વિભાગે એક મોટી અને સફળ કાર્યવાહી હાથ ધરી છે. મોહનપુર-ખોવઈ નેશનલ હાઈવે પર ગઈકાલે કરવામાં આવેલી એક વિશેષ તપાસ દરમિયાન વિભાગે ૪.૪૯ કરોડ રૂપિયાની અંદાજિત કિંમતનો ૮૯૮ કિલો ગાંજો જપ્ત કર્યો છે. ડ્રગ્સ માફિયાઓએ આ જથ્થાને ટ્રકની ઇંધણ ટાંકીમાં અત્યંત ચતુરાઈથી છુપાવ્યો હતો, પરંતુ એક્સાઇઝની સતર્ક ટીમે તેમની આ યોજના નિષ્ફળ બનાવી દીધી હતી.

ટ્રકની ટાંકી બની ડ્રગ્સના સંગ્રહનું સાધન

પ્રાપ્ત વિગતો મુજબ, હેઝામારા વિસ્તારમાં આવેલી બોરપુકુર એસબી સ્કૂલ નજીક તપાસ દરમિયાન કમાલપુર તરફ જતી એક શંકાસ્પદ ટ્રકને એક્સાઇઝ વિભાગના અધિકારીઓએ અટકાવી હતી. વાહનની ઝીણવટભરી તપાસ દરમિયાન અધિકારીઓ પણ આશ્ચર્યચકિત થઈ ગયા હતા, કારણ કે ટ્રકની ઇંધણ ટાંકીની અંદર ખાસ ખાના બનાવીને ૧૩૫ પેકેટમાં કુલ ૮૯૮ કિલો ગાંજો છુપાવવામાં આવ્યો હતો. આટલી મોટી માત્રામાં ડ્રગ્સનો જથ્થો પકડાયો હોવાથી આ મામલો રાજ્યમાં ચર્ચાનો વિષય બન્યો છે.

આરોપી ડ્રાઇવરની ધરપકડ, કાયદાનો ગાળિયો કસાયો

એક્સાઇઝ વિભાગે આ કેસમાં ટ્રક ડ્રાઇવરની તાત્કાલિક ધરપકડ કરી છે. નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટની કડક કલમો હેઠળ ગુનો નોંધીને પોલીસે તપાસના ચક્રો ગતિમાન કર્યા છે. વિભાગના અધિકારીઓએ જણાવ્યું હતું કે આ ડ્રગ્સનો જથ્થો ક્યાંથી લાવવામાં આવ્યો હતો અને કોને પહોંચાડવાનો હતો, તે દિશામાં સઘન તપાસ કરવામાં આવી રહી છે. ડ્રગ્સના આ મોટા નેટવર્કમાં અન્ય કોઈ મોટા માથાઓ સંડોવાયેલા છે કે કેમ, તે અંગે પણ પૂછપરછ શરૂ કરવામાં આવી છે.

સરહદી વિસ્તારોમાં ડ્રગ્સની હેરાફેરી અટકાવવા માટે ત્રિપુરા એક્સાઇઝ વિભાગ સતત કાર્યરત છે. આ જપ્તી બાદ ડ્રગ્સ માફિયાઓમાં ફફડાટ વ્યાપી ગયો છે. રાજ્ય સરકારની ડ્રગ-ફ્રી ત્રિપુરાની ઝુંબેશમાં આ કાર્યવાહી એક મહત્વનું પગલું માનવામાં આવી રહ્યું છે.