નવી દિલ્‍હી : દેશના સર્વોચ્‍ચ નાગરિક સન્‍માનોમાંના એક એવા પદ્મ પુરસ્‍કારો માટે આ વર્ષે ૧૩૧ પ્રતિષ્ઠિત હસ્‍તીઓના નામ પસંદ કરવામાં આવ્‍યા છે. જેમાંથી ૬૬ લોકો પહેલાથી જ સન્‍માનિત થઈ ચૂકયા છે અને બાકીનાને ૨૩ જૂને સન્‍માનિત કરવામાં આવશે. ૨૩ જૂને પદ્મ પુરસ્‍કાર સમારોહના બીજા તબક્કામાં રાષ્‍ટ્રપતિ દ્રૌપદી મુર્મુ પાસેથી પદ્મ પુરસ્‍કાર મેળવનાર ફિલ્‍મ હસ્‍તીઓમાં અભિનેતા-ફિલ્‍મ નિર્માતા આર.માધવન, પીઢ મલયાલમ સુપરસ્‍ટાર મામૂટી, અભિનેતા સતીશ શાહ અને તેલુગુ સિનેમાના દિગ્‍ગજ રાજેન્‍દ્ર પ્રસાદનો સમાવેશ થાય છે.

મે ૨૦૨૬ માં યોજાયેલા પ્રથમ એવોર્ડ સમારોહમાં ૬૬ લોકોને એવોર્ડ આપવામાં આવ્‍યા હતા. બીજો સમારોહ હવે રાષ્‍ટ્રપતિ ભવનમાં યોજાશે. પુરસ્‍કારો મર્યાદિત ઔપચારિક કાર્યક્રમના ભાગ રૂપે રજૂ કરવામાં આવતા હોવાથી બાકીના વિજેતાઓનું સન્‍માન બીજા તબક્કામાં કરવામાં આવશે.

પ્રસિદ્ધ અભિનેતા આર. માધવનને પણ પદ્મ શ્રીથી સન્‍માનિત કરવામાં આવશે. મેડી તરીકે જાણીતા, આ અભિનેતાએ ટેલિવિઝન અને સિનેમામાં સફળ કારકિર્દી બનાવી છે. તેમણે તમિળ, હિન્‍દી અને અન્‍ય ઘણી ભાષાઓમાં ૧૨૦૦થી વધુ ટેલિવિઝન એપિસોડ અને ૭૫ ફિલ્‍મોમાં અભિનય કર્યો છે. તેઓ કળષિ પ્રવળત્તિઓમાં પણ સામેલ છે. જેમાં મુંબઈમાં ઓર્ગેનિક હાઇડ્રોપોનિક ખેતી અને તમિલનાડુમાં નારિયેળ ફાર્મનો સમાવેશ થાય છે.

ફિલ્‍મ ઉદ્યોગના પ્રખ્‍યાત વ્‍યક્‍તિ મામૂટીને ૨૩ જૂને પદ્મ ભૂષણથી સન્‍માનિત કરવામાં આવશે. પાંચ દાયકાથી વધુની કારકિર્દીમાં, મામૂટીએ વિવિધ ભાષાઓમાં ૪૦૦થી વધુ ફિલ્‍મોમાં અભિનય કર્યો છે. ફિલ્‍મો ઉપરાંત તેઓ સામાજિક અને પરોપકારી કાર્યો માટે પણ જાણીતા છે. થિયેટર, ટેલિવિઝન અને ફિલ્‍મોમાં તેમના કાર્ય માટે જાણીતા સતીશ શાહને પણ પદ્મ શ્રી પ્રાપ્ત થશે. તેમની કારકિર્દી ચાર દાયકાથી વધુની છે અને તેઓ તેમના હાસ્‍ય સમય અને યાદગાર અભિનય માટે પ્રખ્‍યાત છે.

પદ્મ માટે પસંદ કરાયેલા રાજેન્‍દ્ર પ્રસાદ તેલુગુ સિનેમાના એક પીઢ અભિનેતા છે. ચાર દાયકાની કારકિર્દીમાં તેમણે ૬ ભાષાઓમાં ૨૮૬થી વધુ ફિલ્‍મોમાં અભિનય કર્યો છે અને તેઓ તેમના સામાજિક કાર્ય માટે પણ જાણીતા છે. આ વર્ષે રાષ્‍ટ્રપતિએ ૧૩૧ પદ્મ પુરસ્‍કારોને મંજૂરી આપી છે. જેમાં પાંચ પદ્મ વિભૂષણ, ૧૩ પદ્મ ભૂષણ અને ૧૧૩ પદ્મશ્રી પુરસ્‍કારોનો સમાવેશ થાય છે.