મુંબઈ,: મહારાષ્ટ્રની મહાયુતિ સરકારમાં બધું બરાબર ચાલી રહ્યું નથી તેવી અટકળોએ ફરી એકવાર જોર પકડ્યું છે. એક સરકારી કાર્યક્રમના આમંત્રણ પત્રિકાને લઈને મુખ્યમંત્રી એકનાથ શિંદે અને નાયબ મુખ્યમંત્રી દેવેન્દ્ર ફડણવીસ વચ્ચેના સંબંધોમાં ખટાશ આવી હોવાની ચર્ચા રાજકીય વર્તુળોમાં શરૂ થઈ ગઈ છે.

હકીકતમાં નાયબ મુખ્યમંત્રી દેવેન્દ્ર ફડણવીસના વિભાગ દ્વારા મુંબઈમાં એક સરકારી કાર્યક્રમનું આયોજન કરવામાં આવ્યું હતું. આ કાર્યક્રમની આમંત્રણ પત્રિકામાં મુખ્ય અતિથિ તરીકે દેવેન્દ્ર ફડણવીસનું નામ હતું, પરંતુ મુખ્યમંત્રી એકનાથ શિંદેનું નામ આમંત્રણ પત્રિકામાં ન હતું. ત્યારબાદ મુખ્યમંત્રી એકનાથ શિંદે આ કાર્યક્રમમાં હાજર પણ રહ્યા ન હતા.

આ ઘટનાને પગલે વિપક્ષને સરકાર પર નિશાન સાધવાની તક મળી ગઈ છે. વિપક્ષી નેતાઓએ આરોપ લગાવ્યો છે કે મહાયુતિમાં બધું બરાબર નથી અને શિંદે-ફડણવીસ વચ્ચે કોલ્ડ વોર ચાલી રહ્યું છે. મુખ્યમંત્રીનું નામ આમંત્રણ પત્રિકામાં ન હોવું અને તેમની ગેરહાજરી ઘણા સવાલો ઉભા કરે છે.

જોકે ભાજપે આ સમગ્ર મામલે ખુલાસો કરતા વિવાદને ફગાવી દીધો છે. ભાજપના પ્રવક્તાએ જણાવ્યું કે મુખ્યમંત્રી શિંદે અન્ય પૂર્વ નિર્ધારિત કાર્યક્રમમાં વ્યસ્ત હોવાથી હાજર રહી શક્યા ન હતા. આ એક પ્રોટોકોલ મુજબનો કાર્યક્રમ હતો અને તેમાં કોઈ રાજકારણ નથી. મહાયુતિ સરકારમાં બધું બરાબર છે અને સરકાર મજબૂતીથી ચાલી રહી છે.

આમ છતાં, આ ઘટનાએ મહારાષ્ટ્રના રાજકારણમાં ગરમાવો લાવી દીધો છે અને આગામી દિવસોમાં તેના પડઘા પડી શકે છે.