મુઝફ્ફરાબાદ : પાકિસ્તાન અધિકૃત કાશ્મીર (PoK) માંથી એક મોટા અને દુઃખદ સમાચાર સામે આવ્યા છે. મુઝફ્ફરાબાદ નજીક બુધવારે પાકિસ્તાન આર્મી એવિએશનનું એક સ્કેલ લશ્કરી Mi-17 હેલિકોપ્ટર ક્રેશ થઈ ગયું છે. પાકિસ્તાની સેના દ્વારા આપવામાં આવેલી સત્તાવાર માહિતી અનુસાર, આ ભયાનક અકસ્માતમાં હેલિકોપ્ટરમાં સવાર તમામ સૈન્ય કર્મચારીઓના ઘટનાસ્થળે જ મોત નીપજ્યા છે. આ દુર્ઘટનાને પગલે પાકિસ્તાની સૈન્ય છાવણીમાં માતમનો માહોલ છવાઈ ગયો છે.
પાકિસ્તાની સૈન્યની મીડિયા શાખા, ઇન્ટર-સર્વિસિસ પબ્લિક રિલેશન્સ (ISPR) એ એક સંક્ષિપ્ત નિવેદન જાહેર કરીને આ ઘટનાની પુષ્ટિ કરી છે. સેનાએ મૃતકોની ચોક્કસ સંખ્યા જાહેર કર્યા વિના જણાવ્યું છે કે, હેલિકોપ્ટરમાં સવાર લોકોમાંથી "કોઈ પણ વ્યક્તિ જીવિત બચી શકી નથી". પ્રારંભિક અહેવાલો મુજબ, આ દુર્ઘટના હેલિકોપ્ટરના ટેક-ઓફ દરમિયાન અચાનક સર્જાયેલી "ટેકનિકલ ખામી" ના કારણે થઈ હોવાનું સામે આવ્યું છે.
ઘટનાની જાણ થતાં જ સેનાની બચાવ અને રાહત ટીમો તાત્કાલિક ઘટનાસ્થળે દોડી ગઈ હતી અને કાટમાળમાંથી મૃતદેહોને બહાર કાઢવાની કામગીરી શરૂ કરી હતી. હેલિકોપ્ટર હવામાંથી સીધું જમીન પર પટકાતા તેમાં આગ લાગી ગઈ હોવાની આશંકા સેવાઈ રહી છે. અકસ્માત પાછળના ચોક્કસ કારણોની ઊંડાણપૂર્વક તપાસ કરવા માટે સેના દ્વારા એક ઉચ્ચ સ્તરીય તપાસ બોર્ડ (Inquiry Board) ની રચના કરવામાં આવી છે. આર્મી સ્ટાફના વડા ફિલ્ડ માર્શલ અસીમ મુનીર અને અન્ય વરિષ્ઠ અધિકારીઓએ આ દુર્ઘટના પર ઊંડો શોક વ્યક્ત કર્યો છે અને મૃતક પરિવારો પ્રત્યે સંવેદના પ્રગટ કરી છે.
પાકિસ્તાની સૈન્યમાં હેલિકોપ્ટર ક્રેશનો સિલસિલો:

પાકિસ્તાની સેના માટે હેલિકોપ્ટર ક્રેશ થવાની આ કોઈ પ્રથમ ઘટના નથી. આ પહેલા સપ્ટેમ્બર ૨૦૨૫માં પણ ગિલગિટ-બાલ્ટિસ્તાનના ડાયમર જિલ્લામાં એક સૈન્ય હેલિકોપ્ટર ટેકનિકલ ખામીના કારણે ક્રેશ થયું હતું, જેમાં પાંચ કર્મચારીઓએ જીવ ગુમાવ્યા હતા. એટલું જ નહીં, ઓગસ્ટ ૨૦૨૫માં પણ ખૈબર પખ્તુનખ્વા સરકારનું એક હેલિકોપ્ટર ખરાબ હવામાનના કારણે મોહમંડ જિલ્લામાં તૂટી પડ્યું હતું, જેમાં બે પાઇલટ સહિત પાંચ લોકોના મોત થયા હતા. વારંવાર બનતી આવી ઘટનાઓ પાકિસ્તાની વાયુસેના અને આર્મી એવિએશનના વિમાનોની જાળવણી (Maintenance) અને સુરક્ષાના સ્તર પર ગંભીર સવાલો ઉભા કરે છે.