મુંબઈ, તા.૧૨: ટાટા મોટર્સે કાર ખરીદવાનું વિચારતા મધ્‍યમવર્ગીય પરિવારો અને ગ્રાહકોને મોટો ઝટકો આપ્‍યો છે. કંપની આગામી ૧ જુલાઈ, ૨૦૨૬થી તેની તમામ પેસેન્‍જર ગાડીઓની કિંમતોમાં ૧.૫% સુધીનો વધારો કરવા જઈ રહી છે. આ નવો ભાવવધારો કંપનીની પેટ્રોલ, ડીઝલ, સીએનજી તેમજ ઇલેક્‍ટ્રિક એમ તમામ પ્રકારની કારો પર લાગુ થશે, જેના કારણે હવે ગ્રાહકોએ પોતાનું મનપસંદ વાહન ખરીદવા માટે ખિસ્‍સા વધુ ઢીલા કરવા પડશે.

આ નિર્ણયને કારણે ટાટાની સૌથી વધુ વેચાતી લોકપ્રિય કારો જેવી કે નેક્‍સન, પંચ, ટિયાગો, હેરિયર, સફારી અને નવી લોન્‍ચ થયેલી કર્વ EV જેવી ગાડીઓ મોંઘી થઈ જશે. કંપનીના જણાવ્‍યા અનુસાર, ઓટોમોબાઈલ ઉત્‍પાદનમાં વપરાતા સ્‍ટીલ, એલ્‍યુમિનિયમ અને બેટરી જેવા કાચા માલના ખર્ચમાં સતત વધારો થઈ રહ્યો છે. વધતા જતા ફુગાવાના દબાણ અને મોંઘા ઇનપુટ કોસ્‍ટને સરભર કરવા માટે કંપની માટે આ ભાવવધારો કરવો અનિવાર્ય બન્‍યો છે.

જો કે, આ ભાવવધારો દરેક મોડેલ અને વેરિઅન્‍ટના આધારે અલગ-અલગ રહેશે, જેમાં પ્રીમિયમ વેરિઅન્‍ટ્‍સ પર વધુ અસર જોવા મળી શકે છે. જો તમે ટાટાની કાર ખરીદવાનું વિચારી રહ્યા હોવ, તો ૩૦ જૂન, ૨૦૨૬ પહેલાં બુકિંગ કરાવીને વર્તમાન નીચા ભાવનો લાભ મેળવી શકો છો. જૂન મહિનાની અંદર બુકિંગ કરાવનાર ગ્રાહકોને આ વધારાની આર્થિક અસરમાંથી મુક્‍તિ મળી શકે છે, પરંતુ તેના માટે ડીલરશીપની શરતો લાગુ રહેશે.