નવી દિલ્હી: બોલિવૂડ સુપરસ્ટાર સલમાન ખાનના વર્ષ ૧૯૯૮ના બહુચર્ચિત કાળિયાર શિકાર કેસ પરથી પ્રેરિત ફિલ્મ ‘કાલા હિરણ: ધ બેટલ ફોર લેગસી’ પર વચગાળાનો સ્ટે લાવવા માટે એક્ટર દ્વારા કરાયેલી અરજી પર દિલ્હી હાઇકોર્ટે ગઈકાલે મોટો નિર્ણય લીધો છે. જસ્ટિસ નીના બંસલ ક્રિશ્નાની સિંગલ બેન્ચે શુક્રવારે ફિલ્મનું ફર્સ્ટ લુક ટીઝર રિલીઝ થયા બાદ આ મામલે ત્વરિત એક્શન લેતા ફિલ્મના પ્રોડ્યુસર અમિત જાની અને ‘જ્ઞાની ફાયરફોક્સ ફિલ્મ્સ’ સહિતના મેકર્સને સત્તાવાર નોટિસ જારી કરી જવાબ માંગ્યો છે, જેની આગામી સુનાવણી ૧૯ જૂને હાથ ધરાશે.
સલમાન ખાનની કાનૂની ટીમ વતી કોર્ટમાં દલીલ કરવામાં આવી હતી કે, ભલે ફિલ્મમાં એક્ટરનું નામ સીધું વાપરવામાં આવ્યું નથી, પરંતુ ફિલ્મના કન્ટેન્ટ અને પાત્રો દ્વારા દર્શકો તેને સરળતાથી ઓળખી શકે છે. ૨૯ મે ૨૦૨૬ના રોજ જાહેર થયેલા પોસ્ટરમાં મુખ્ય પાત્ર સલમાન ખાન જેવું જ દેખાય છે અને તેણે સલમાન ખાનની સિગ્નેચર સ્ટાઈલ ગણાતું ‘વાદળી રંગનું ફિરોઝા બ્રેસલેટ’ પહેરેલું છે. પોસ્ટરમાં પાત્રને હાથમાં હથિયાર (ગન) સાથે દર્શાવાયું છે, જ્યારે સલમાન ખાન વર્ષ ૨૦૧૭માં જ ‘આર્મ્સ એક્ટ’ કેસમાંથી નિર્દોષ છૂટી ગયો છે. વકીલોએ દલીલ કરી કે આ કેસ હાલમાં રાજસ્થાન હાઈકોર્ટમાં પેન્ડિંગ છે અને મે ૨૦shortcut૨૬ની સુનાવણી બાદ તેની આગામી તારીખ ૧૩ જુલાઈ ૨૦૨૬ નક્કી કરાઈ છે. આવા સમયે ફિલ્મ લાવવાથી ન્યાયિક પ્રક્રિયા પ્રભાવિત થઈ શકે છે.
આ વિવાદે ત્યારે વધુ હિંસક અને નાટકીય વળાંક લીધો જ્યારે ફિલ્મના પ્રોડ્યુસર અમિત જાનીએ સલમાન ખાન દ્વારા મોકલાયેલી કાનૂની નોટિસને લાઈવ વીડિયોમાં ફાડી નાખી. તેમણે ઇન્સ્ટાગ્રામ પર વીડિયો શેર કરતા દાવો કર્યો કે છેલ્લા ૩૬ કલાકથી તેમને સલમાન ખાનની ટૂલકિટ અને અંડરવર્લ્ડ ‘ડી-કંપની’ના નામે જાનથી મારી નાખવાની ધમકીઓ મળી રહી છે, જેનો આ યોગ્ય જવાબ છે. બીજી તરફ, ન્યૂઝ એજન્સી સાથેની વાતચીતમાં અમિત જાનીએ સ્પષ્ટતા કરી હતી કે, આ ફિલ્મ કોઈ સલમાન ખાનની બાયોપિક નથી, પરંતુ તે વન્યજીવોના રક્ષણ માટે કટિબદ્ધ ‘બિશ્નોઈ સમુદાય’ના વારસા અને તેમના સંઘર્ષની વાર્તા છે, જેમાં સલમાન ખાનનો કેસ માત્ર એક નાનો ભાગ છે.
ઉલ્લેખનીય છે કે આ વિવાદ વર્ષ ૧૯૯૮માં જોધપુર ખાતે ફિલ્મ ‘હમ સાથ-સાથ હૈં’ના શૂટિંગ દરમિયાન શરૂ થયો હતો, જેમાં ૦૫ એપ્રિલ ૨૦૧૮ના રોજ કોર્ટે સલમાનને ૫ વર્ષની જેલની સજા ફટકારી હતી અને હાલ તેઓ જામીન પર છે. હવે આ મામલે હાઇકોર્ટ ફિલ્મ રિલિઝિંગ પર સ્ટે મૂકે છે કે પ્રોડ્યુસરની દલીલો ગ્રાહ્ય રાખે છે તે ૧૯ જૂનની કટોકટીભરી સુનાવણી પર નિર્ભર રહેશે. આ હાઈ પ્રોફાઈલ કાનૂની જંગને કારણે ફિલ્મ ઉદ્યોગ અને કાનૂની ક્ષેત્રના નિષ્ણાતોની નજર દિલ્હી હાઇકોર્ટના આગામી વલણ પર ટકેલી છે.