નવી દિલ્હી : દિલ્હી અને આસપાસના વિસ્તારોમાં આજે અચાનક વાતાવરણ બદલાતા ગરમીથી રાહત મળી છે, પરંતુ તેજ આંધીએ મુશ્કેલી પણ વધારી છે. દિલ્હીના પાલમમાં 92 કિમી પ્રતિ કલાકની ઝડપે પવન ફૂંકાતા હવામાન વિભાગ (IMD) દ્વારા રેડ એલર્ટ જાહેર કરવામાં આવ્યું છે. અનેક વિસ્તારોમાં વીજળીના કડાકા સાથે વરસાદી ઝાપટાં પડવાની સંભાવના વ્યક્ત કરવામાં આવી છે.

દિલ્હી-NCR માં ગરમીથી તો છૂટકારો મળ્યો છે, પરંતુ આ વાતાવરણના ફેરફારને કારણે સામાન્ય જનજીવન પ્રભાવિત થયું છે. સોશિયલ મીડિયા પર લોકો આ આંધી અને વરસાદના વીડિયો સતત શેર કરી રહ્યા છે. હરિયાણાના રોહતક તરફથી આવેલા સક્રિય વાદળોના કારણે દિલ્હીના આકાશમાં અચાનક અંધારું છવાઈ ગયું હતું, જેને કારણે વાહનચાલકોને ભારે મુશ્કેલીનો સામનો કરવો પડ્યો હતો.

હવામાન વિભાગે સ્પષ્ટ કર્યું છે કે આવનારા થોડા કલાકો દિલ્હીવાસીઓ માટે સાવચેતીભર્યા રહેશે. રોહતક, ખરખોદા, પલવલ સહિત દિલ્હીના બવાના, રાજોરી ગાર્ડન, પટેલ નગર, સફદરજંગ અને લોધી રોડ જેવા વિસ્તારોમાં તોફાની પવનોની અસર વધુ રહેશે.

IMD ના રિપોર્ટ મુજબ, પવનની ગતિ 60 થી 70 કિમી પ્રતિ કલાક રહી શકે છે, જે ક્યારેક 90 કિમી સુધી પણ પહોંચી શકે છે. નાગરિકોને સલાહ આપવામાં આવે છે કે તેઓ અતિ આવશ્યક કામ સિવાય બહાર ન નીકળે અને સુરક્ષિત સ્થળે આશરો લે. વીજળીના કડાકા અને તેજ પવનને જોતા ઝાડ કે વીજળીના થાંભલાઓ નીચે ઊભા ન રહેવા સૂચના આપવામાં આવી છે.

દિલ્હીમાં આ પ્રકારના વાતાવરણને જોતા ડિઝાસ્ટર મેનેજમેન્ટની ટીમો પણ સતર્ક કરવામાં આવી છે. રસ્તાઓ પર ટ્રાફિકની સમસ્યા સર્જાઈ શકે છે, તેથી મુસાફરી કરતા પહેલા લેટેસ્ટ અપડેટ્સ મેળવી લેવા હિતાવહ છે