વોશિંગ્ટન: અમેરિકાની અગ્રણી તપાસ એજન્સી એફબીઆઈ (FBI) દ્વારા આઉટલુક અને માઇક્રોસોફ્ટ ૩૬૫ ના કરોડો યુઝર્સ માટે એક અત્યંત અગત્યની અને કટોકટીની ચેતવણી જારી કરવામાં આવી છે. એફબીઆઈએ એક જાહેર સેવા જાહેરાત (PSA) માં જણાવ્યું છે કે સાયબર ગુનેગારો સામાન્ય સુરક્ષા પગલાંને પણ સરળતાથી બાયપાસ કરી શકે તેવી એક નવી અને અત્યંત આધુનિક હેકિંગ સિસ્ટમનો ઉપયોગ કરી રહ્યા છે. ‘Kali365’ તરીકે ઓળખાતા આ પ્લેટફોર્મ અને સર્વિસ દ્વારા માઇક્રોસોફ્ટ એકાઉન્ટ્સને નિશાન બનાવીને અત્યંત ગંભીર પ્રકારના ફિશિંગ હુમલા કરવામાં આવી રહ્યા છે, જેના કારણે આખા વિશ્વના યુઝર્સ પર ઇમેઇલ એકાઉન્ટ હાઇજેક થવાનું મોટું જોખમ તોળાઈ રહ્યું છે.

એફબીઆઈના સત્તાવાર અહેવાલ મુજબ, આ સાયબર ગુનેગારો ભોગ બનનાર વ્યક્તિને સૌપ્રથમ એક એવો ઇમેઇલ મોકલે છે જે કોઈ વિશ્વાસપાત્ર ક્લાઉડ પ્રોડક્ટિવિટી અથવા ડોક્યુમેન્ટ શેરિંગ સર્વિસમાંથી આવ્યો હોય તેવો આબેહૂબ દેખાય છે. આ મેસેજની અંદર એક વિશેષ ડિવાઇસ કોડ અને કેટલીક સૂચનાઓ આપેલી હોય છે, જે યુઝરને માઇક્રોસોફ્ટના જ એક લેજિટિમેટ (અસલી) લોગિન અને વેરિફિકેશન પેજ તરફ દોરી જાય છે. યુઝર આ રિક્વેસ્ટને સાચી માનીને જેવો તે કોડ માઇક્રોસોફ્ટની સત્તાવાર વેબસાઇટ પર સબમિટ કરે છે, કે તરત જ તે અજાણતામાં હેકરના ડિવાઇસને પોતાના એકાઉન્ટનો એક્સેસ મેળવવા માટે અધિકૃત કરી દે છે.

એકવાર યુઝર આ પ્રક્રિયા પૂર્ણ કરે એટલે હેકર્સ તેના એકાઉન્ટના ખાસ ઓથેન્ટિકેશન ટોકન્સ, જેને ઓથ (OAuth) એક્સેસ અને રિફ્રેશ ટોકન્સ કહેવામાં આવે છે, તેને ચોરી લે છે. આ ટોકન્સ એક પ્રકારના ડિજિટલ હોલ પાસ (ગેટ પાસ) તરીકે કામ કરે છે. આ ટોકન્સ સફળ લોગિન પછી જ જનરેટ થતા હોવાના કારણે સાયબર ગુનેગારો માઇક્રોસોફ્ટની ટુ-ફેક્ટર અથવા મલ્ટિ-ફેક્ટર ઓથેન્ટિકેશન જેવી મજબૂત સુરક્ષા સિસ્ટમને પણ સહેલાઈથી બાયપાસ કરી દે છે. પરિણામે, હેકર્સ યુઝરના પાસવર્ડ વગર જ તેના આઉટલુક, ટીમ્સ, વનડ્રાઇવ સહિતની તમામ માઇક્રોસોફ્ટ સેવાઓ પર લાંબા સમય સુધી પોતાનો ગેરકાયદેસર કબજો જાળવી રાખે છે.

એફબીઆઈએ ખુલાસો કર્યો છે કે હેકર્સને આ સ્કેમિંગ ઇન્ડસ્ટ્રીમાં લાવવા માટે ‘Kali365’ પ્લેટફોર્મ ૨૫૦ ડોલર પ્રતિ મહિનાના સબ્સ્ક્રિપ્શન પર વેચવામાં આવી રહ્યું છે. આ પ્લેટફોર્મ ઓછા ટેકનિકલ જ્ઞાન ધરાવતા હેકર્સને પણ આર્ટિફિશિયલ ઇન્ટેલિજન્સ (AI) દ્વારા જનરેટ કરાયેલા ફિશિંગ મેસેજ, ઓટોમેટેડ કેમ્પેઈન ટેમ્પલેટ્સ, રિયલ-ટાઇમ ટાર્ગેટ ટ્રેકિંગ ડેશબોર્ડ અને ઓથ (OAuth) ટોકન કેપ્ચર કરવાની ઘાતક ક્ષમતાઓ પૂરી પાડે છે. આ જોખમને ખાળવા માટે એફબીઆઈએ તમામ સંસ્થાઓ અને બિઝનેસ હાઉસીસને માઇક્રોસોફ્ટના 'ડિવાઇસ કોડ ફ્લો' (device code flow) નામના ફીચરને તાત્કાલિક બ્લોક અથવા ડિસેબલ કરવા ભારપૂર્વક ભલામણ કરી છે.

જોકે, આ ફીચર બંધ કરતાં પહેલાં વ્યવસાયોએ આંતરિક વર્કફ્લો ખોરવાય નહીં તેની સમીક્ષા કરવી જરૂરી છે. જે સંસ્થાઓ તેને સંપૂર્ણ બંધ ન કરી શકે, તેમણે ઇમરજન્સી એક્સેસ એકાઉન્ટ્સને તેમાંથી મુક્તિ આપવી જોઈએ જેથી એડમિનિસ્ટ્રેટર્સ સિસ્ટમની બહાર ન ફેંકાઈ જાય. આ સિવાય એફબીઆઈએ કમ્પ્યુટરમાંથી મોબાઈલ ઉપકરણોમાં ઓથેન્ટિકેશન ટ્રાન્સફર અટકાવવાની પોલિસી લાગુ કરવા અને યુઝર્સને અજાણ્યા સોર્સ પરથી આવેલા એક્સેસ કોડની લિંક્સ પર ક્લિક ન કરવા તેમજ શંકાસ્પદ ઇમેઇલ્સ અને લોગિન સેશન્સની વિગતો તુરંત જ ઇન્ટરનેટ ક્રાઇમ કમ્પ્લેઇન્ટ સેન્ટર (IC3) ને રિપોર્ટ કરવા તાકીદ કરી છે.