નવી દિલ્હી | તા. 1૬ જૂન, 2026: પશ્ચિમ એશિયામાં વર્તમાન ભૌગોલિક-રાજકીય તણાવને કારણે ઉર્જા સુરક્ષા અંગે ઉભી થયેલી ચર્ચાઓ વચ્ચે ભારત સરકારે દેશવાસીઓને આશ્વસ્ત કર્યા છે. નવી દિલ્હીમાં એક ઉચ્ચ-સ્તરીય આંતર-મંત્રાલય બ્રીફિંગ દરમિયાન સ્પષ્ટ કરવામાં આવ્યું છે કે, ભારતની તમામ રિફાઇનરીઓ પાસે ક્રૂડ ઓઈલનો પર્યાપ્ત સ્ટોક છે અને તેઓ પૂરી ક્ષમતા સાથે કામ કરી રહી છે. પેટ્રોલ અને ડીઝલની અછતની કોઈપણ શક્યતાને નકારતા સરકારે જણાવ્યું કે, ગ્રાહકોની જરૂરિયાતોને પહોંચી વળવા પૂરતો સ્ટોક ઉપલબ્ધ છે.
જથ્થાબંધ ગ્રાહકો માટે નવા નિયમો
સંયુક્ત સચિવ સુજાતા શર્માએ માહિતી આપી હતી કે રિટેલ આઉટલેટ્સ (પેટ્રોલ પંપ) પર વેચાણમાં જોવા મળેલા અસામાન્ય ઉછાળાને નિયંત્રિત કરવા માટે સરકારે કેટલાક પગલાં લીધા છે. ઔદ્યોગિક અને સંસ્થાકીય ગ્રાહકોને હવે રિટેલ આઉટલેટ્સને બદલે તેમના પોતાના ગ્રાહક પંપમાંથી ઇંધણ લેવા જણાવાયું છે. સાથે જ, સામાન્ય રિટેલ ગ્રાહકો માટે પ્રતિ દિવસ 200 લિટર સુધીની મર્યાદા નક્કી કરવામાં આવી છે, જેથી સંગ્રહખોરી અટકાવી શકાય અને દરેક ગ્રાહકને સમાન રીતે પુરવઠો મળી રહે. છેલ્લા ચાર દિવસમાં એક કરોડ 84 લાખથી વધુ LPG સિલિન્ડરનું વિતરણ કરીને સરકારે ગેસની ઉપલબ્ધતા પણ સુનિશ્ચિત કરી છે.
ખેડૂતો માટે ખાતરનો પૂરતો જથ્થો
ખરીફ સીઝન 2026 ને ધ્યાનમાં રાખીને, ખાતર વિભાગે પણ રાહતભર્યા સમાચાર આપ્યા છે. ખાતર વિભાગના સંયુક્ત સચિવ બંદના પ્રેયાશીએ જણાવ્યું કે, દેશમાં ખાતરનો સ્ટોક સામાન્ય છે. આ ખરીફ સીઝન માટે 383.9 લાખ મેટ્રિક ટનની જરૂરિયાત અંદાજવામાં આવી છે, જેમાંથી ખેડૂતોએ અત્યાર સુધીમાં 102.78 લાખ મેટ્રિક ટન રાસાયણિક ખાતરોની ખરીદી કરી લીધી છે. આમ, ખેતીવાડી માટે જરૂરી ખાતરનો પુરવઠો પૂરતા પ્રમાણમાં હોવાનું સ્પષ્ટ થયું છે.
ભારતીય જહાજો અને નાવિકો સુરક્ષિત
સમુદ્રી માર્ગે થતી ઉર્જા સપ્લાય અંગે બંદરો, શિપિંગ અને જળમાર્ગ મંત્રાલયે મોટી માહિતી આપી છે. 62,370 મેટ્રિક ટન કાર્ગો લઈને જતું LNG જહાજ 'DISHA' હોર્મુઝની સામુદ્રધુનીમાંથી સુરક્ષિત રીતે પસાર થઈ ગયું છે અને ગુરુવારે દહેજ બંદરે પહોંચવાની ધારણા છે. શિપિંગ ડાયરેક્ટોરેટ જનરલ સતત પરિસ્થિતિ પર નજર રાખી રહ્યું છે. વધુમાં, છેલ્લા 96 કલાકમાં ગલ્ફ ક્ષેત્રમાંથી 50 જેટલા નાવિકોને સ્વદેશ પરત લાવવા સાથે, અત્યાર સુધીમાં કુલ 3587 થી વધુ ભારતીય નાવિકોને સુરક્ષિત રીતે તેમના વતન પહોંચાડવાની સફળ કામગીરી કરવામાં આવી છે.