મુંબઈ, તા. 16 : બોલિવૂડ અભિનેત્રી અને પર્યાવરણ કાર્યકર્તા દિયા મિર્ઝાનું તાજેતરનું નિવેદન સોશિયલ મીડિયા પર જોરદાર ચર્ચાનો વિષય બન્યું છે. એક કાર્યક્રમ દરમિયાન દિયા મિર્ઝાએ કહ્યું હતું કે પિતૃસત્તાક વ્યવસ્થા અને પુરુષોના નિર્ણયોને કારણે જ આબોહવા પરિવર્તન-Climate Change જેવી કટોકટી સર્જાઈ છે. તેમના આ નિવેદન બાદ નેટિઝન્સ બે ભાગમાં વહેંચાઈ ગયા છે.

દિયા મિર્ઝાએ પોતાના નિવેદનમાં જણાવ્યું કે પુરુષ પ્રભુત્વવાળા સમાજમાં લેવાતા ઔદ્યોગિક અને પર્યાવરણ વિરોધી નિર્ણયોને કારણે ગ્લોબલ વોર્મિંગ અને ક્લાઇમેટ ચેન્જની સમસ્યા વકરી છે. તેમણે મહિલાઓની ભાગીદારી વધે તો પર્યાવરણ બચી શકે તેવો મુદ્દો પણ ઉઠાવ્યો હતો.

જોકે, તેમનું આ નિવેદન ટ્વિટર અને ઇન્સ્ટાગ્રામ પર આવતાની સાથે જ ટ્રોલિંગ શરૂ થઈ ગયું. ઘણા યુઝર્સે તેમને ‘માઉન્ટ સ્ટુપિડ’ સુધીનું બિરુદ આપી દીધું. નેટિઝન્સે કહ્યું કે વૈજ્ઞાનિક સમસ્યાને જાતિ સાથે જોડવી એ તર્ક વિનાની વાત છે. ઘણાએ મીમ્સ અને વ્યંગાત્મક પોસ્ટ બનાવીને દિયાની મજાક ઉડાવી.

બીજી તરફ કેટલાક ચાહકો અને મહિલા સંગઠનોએ દિયા મિર્ઝાનો બચાવ કર્યો. તેમનું કહેવું છે કે દિયાએ જે વાત કહી તે પૂરેપૂરી ખોટી નથી. પિતૃસત્તાક વિચારસરણીને કારણે સંસાધનોના અતિશય ઉપયોગ અને યુદ્ધોને પ્રોત્સાહન મળ્યું છે જે પરોક્ષ રીતે પર્યાવરણને નુકસાન કરે છે.

દિયા મિર્ઝા વર્ષોથી સંયુક્ત રાષ્ટ્રના પર્યાવરણ કાર્યક્રમ-UNEPની ગુડવિલ એમ્બેસેડર તરીકે કામ કરી રહી છે. તે હંમેશા પર્યાવરણ બચાવવાના મુદ્દે અવાજ ઉઠાવતી રહી છે. પરંતુ આ વખતે તેમની વાત કરવાની રીત અને શબ્દોને કારણે વિવાદ સર્જાયો છે.

હવે આ નિવેદન પર દિયા મિર્ઝા સ્પષ્ટતા કરે છે કે કેમ અને ટ્રોલિંગનો જવાબ આપે છે કે કેમ તે જોવું રહ્યું. સોશિયલ મીડિયા પર આ ચર્ચા હજુ પૂરજોશમાં ચાલુ છે.