નવી દિલ્હી :  વિદેશમાં ઉચ્ચ શિક્ષણ મેળવવા માંગતા ભારતીય વિદ્યાર્થીઓ માટે એક અત્યંત મહત્વના અને ઉત્સાહજનક સમાચાર સામે આવ્યા છે. પ્રતિષ્ઠિત 'રોડ્સ શિષ્યવૃત્તિ 2027' માટે અરજી પ્રક્રિયા સત્તાવાર રીતે શરૂ થઈ ગઈ છે. યુનાઇટેડ કિંગડમની વિશ્વવિખ્યાત ઓક્સફોર્ડ યુનિવર્સિટીમાં અનુસ્નાતક (Postgraduate) અભ્યાસ કરવા માંગતા તેજસ્વી યુવાનો માટે આ શિષ્યવૃત્તિ એક વૈશ્વિક પ્લેટફોર્મ પૂરું પાડે છે.
સમયમર્યાદા અને પાત્રતા:
રોડ્સ ટ્રસ્ટ દ્વારા જાહેર કરાયેલા કાર્યક્રમ મુજબ, અરજીઓ 1 જૂન, 2026 થી સ્વીકારવાનું શરૂ કરવામાં આવ્યું છે અને અરજી કરવાની અંતિમ તારીખ 23 જુલાઈ, 2026 (રાત્રે 11:59 IST) છે. આ વર્ષે ભારત માટે પાંચ શિષ્યવૃત્તિઓ ફાળવવામાં આવી છે, જે ભારતીય ઉમેદવારો માટે એક મોટી તક છે. 1947 થી અત્યાર સુધી 200 થી વધુ ભારતીયો આ શિષ્યવૃત્તિ મેળવીને વૈશ્વિક સ્તરે ભારતનંર નામ રોશન કરી ચૂક્યા છે.
પસંદગી પ્રક્રિયા અને માર્ગદર્શન:
આ શિષ્યવૃત્તિ માટેની પસંદગી પ્રક્રિયા અત્યંત સ્પર્ધાત્મક છે અને તેનું નેતૃત્વ ભારતના રાષ્ટ્રીય સચિવ ડૉ. ધ્વનિ મહેતાની દેખરેખ હેઠળ કરવામાં આવે છે. અરજદારોએ પાત્રતાના તમામ માપદંડો પૂર્ણ કરવા અનિવાર્ય છે. વિદ્યાર્થીઓને સલાહ આપવામાં આવે છે કે તેઓ રોડ્સ ટ્રસ્ટની સત્તાવાર વેબસાઇટ પર ઉપલબ્ધ "ઉમેદવારો માટે માહિતી" દસ્તાવેજને ધ્યાનપૂર્વક વાંચે. અરજદારોની મદદ માટે ઓક્સફર્ડમાં અભ્યાસ કરતા વર્તમાન વિદ્વાનો દ્વારા ખાસ 'સ્કોલર ગાઈડ' પણ તૈયાર કરવામાં આવી છે, જેથી તેઓ આખી પ્રક્રિયાને સરળતાથી સમજી શકે.
વિદ્યાર્થીઓ માટે ખાસ સૂચના:
આ શિષ્યવૃત્તિ માત્ર અભ્યાસનો ખર્ચ જ નથી ઉઠાવતી, પરંતુ તે એક વિદ્વાનોના વૈશ્વિક સમુદાયનો હિસ્સો બનવાની તક પણ આપે છે. જે ઉમેદવારો ઉચ્ચ શિક્ષણ અને સંશોધનમાં ઉત્કૃષ્ટ દેખાવ કરવા માંગે છે, તેમણે નિર્ધારિત સમયમર્યાદા પહેલાં તેમના તમામ સહાયક દસ્તાવેજો અને અરજીઓ સબમિટ કરી દેવી જોઈએ.