બર્લિન (જર્મની) :  તિબેટના વડા (સિક્યોંગ) પેનપા ત્સિરિંગે જર્મનીના બર્લિન ખાતે આયોજિત 'તિબેટ ઇનિશિયેટિવ ડોઇચલેન્ડ'ની 37મી વાર્ષિક સભામાં ચીનના તિબેટ પ્રત્યેના અભિગમની આકરી ટીકા કરી છે. તેમણે સ્પષ્ટ શબ્દોમાં જણાવ્યું હતું કે, તિબેટના મુદ્દાને ચીનના દ્રષ્ટિકોણથી નહીં, પરંતુ ઐતિહાસિક તથ્યોના આધારે જોવો જોઈએ. પેનપા ત્સિરિંગે ભારપૂર્વક કહ્યું કે, ઈતિહાસને તોડી-મરોડીને કે લોકોની ધાર્મિક અને સાંસ્કૃતિક ઓળખનું દમન કરીને તિબેટમાં ક્યારેય સ્થાયી શાંતિ સ્થાપી શકાશે નહીં.
ચીની ઈતિહાસકારોના સંશોધનથી જ બેઇજિંગનો પર્દાફાશ:
સિક્યોંગે પોતાના સંબોધનમાં ચીની ઈતિહાસકાર પ્રોફેસર હોન-શિયાંગ લાઉના સંશોધનનો ઉલ્લેખ કર્યો હતો. આ સંશોધન ચીનના યુઆન, મિંગ અને કિંગ વંશના આર્કાઇવ્સના આધારે તિબેટ સાથેના સંબંધો વિશેના ચીનના સરકારી દાવાઓને સીધો પડકાર આપે છે. પેનપા ત્સિરિંગે કહ્યું કે, વિશ્વએ ચીની પ્રોપેગેન્ડાને બદલે તિબેટના વાસ્તવિક રાજકીય દરજ્જા, સંસ્કૃતિ અને ધર્મને નિષ્પક્ષ રીતે સમજવાની જરૂર છે.
તિબેટમાં વધતા દમન અને ચીનની નીતિઓ પર ચિંતા:
તિબેટની અંદરની ગંભીર પરિસ્થિતિ વિશે ચિંતા વ્યક્ત કરતા સિક્યોંગે જણાવ્યું કે, ચીન દ્વારા લાગુ કરાયેલ 'એથનિક યુનિટી એન્ડ પ્રોગ્રેસ લો' અને તિબેટમાં વધી રહેલી કડક દેખરેખને કારણે ત્યાંના લોકોના પાયાના અધિકારો છીનવાઈ રહ્યા છે. ધાર્મિક સ્વતંત્રતા પર પ્રતિબંધો, લોકોનું બળજબરીથી ચીની સંસ્કૃતિમાં વિલીનીકરણ અને પર્યાવરણીય વિનાશ એ તિબેટના ભવિષ્ય માટે મોટા પડકારો છે. તેમણે ચીન દ્વારા દેશની બહાર વસતા તિબેટીઓને નિશાન બનાવવાના પ્રયાસોની પણ આકરી ટીકા કરી હતી.
દલાઈ લામાના પુનર્જન્મ પર તિબેટીઓનો જ અધિકાર:
આંતરરાષ્ટ્રીય મંચ પરથી સિક્યોંગે ફરી એકવાર સ્પષ્ટ કર્યું કે, દલાઈ લામાના આગામી પુનર્જન્મને ઓળખવાનો એકમાત્ર અને વિશેષ અધિકાર તિબેટીયન બૌદ્ધ પરંપરાઓ અને તિબેટના લોકો પાસે છે. તેમણે યુરોપિયન નેતાઓ અને નીતિ નિર્ધારકો સાથે આ મુદ્દે ચર્ચા કરી છે અને માનવ અધિકારો, ધાર્મિક સ્વતંત્રતા તથા પર્યાવરણના રક્ષણ માટે વૈશ્વિક સમર્થનની માંગ કરી છે. પેનપા ત્સિરિંગનો આ સંદેશ સ્પષ્ટ છે કે, તિબેટના મુદ્દા પર ચીનનું જૂઠ હવે વધુ સમય સુધી દુનિયા સામે ટકી શકશે નહીં.